University of Virginia Library

Of twelue articles of vre be-leue.

But no mon may, þe Bok hit seiþ,
Plese God wiþ-outen feiþ.
Þerfore mo þinges is good to meue:
Þe twelue articles of vre bi-leue.
Of alle þe twelue þis is þe most:
Þat ffader & Sone and Holi gost
On God Almihti in Trinite
Euer was, and is, and euer schal be;
Heuene and eorþe he haþ wrouȝt,
And al þis world he maade of nouȝt.
Þe ffader sende his sone Ihesu
Þorw þe holygost vertu,
God and Mon of Mayde Marie
To be boren, and for vs to dye,
And buried was, þorw his good wille,
To sauen vs alle þat we ne schulde spille.
To helle he wente whon he was ded,
Þe soule Ioyned to his godhed;
ffrom helle he hem fette swiþe blyue
Þat him hedde serued in heore lyue.
Vp he ros þe þridde day,
As he was God and Mon verray;
Riht so schul we, as seiþ seint poule,
Rysen vp in bodi and in soule
At þe grete day of doom—
Þerof I rede we take good goom!
Þen schal he demen al apert
Vche mon after his decert.
God and Mon to heuene he went;
Þe holigost to þe Apostles sent.
Þorw him so mowe we heuene wynne,
Ȝif we dyen out of dedly synne.