 | The Barkers |  |
5
[Scene II]
Hell.
13.
Lucifer deiabolus in inferno.Owte owte! harrowe! helples, slyke hote at es here,
This es a dongon of dole þat I am to-dyghte,
Whare es my kynde be-come, so cumly and clere,
Nowe am I laytheste, allas! þat are was lighte.
My bryghtnes es blakkeste and blo nowe;
My bale es ay betande and brynande,
That gares ane go gowlande and gyrnande.
Owte! ay walaway! I well enew in wo nowe!
14.
Secundus diabolus.Owte! owte! I go wode for wo, my wytte es all wente nowe,
All oure fode es but filth, we fynde vs beforn,
We þat ware beelded in blys in bale are we brent nowe,
Owte! on þe Lucifer, lurdan! oure lyghte has þu lorne.
Þi dedes to þis dole nowe has dyghte us,
To spill vs þu was oure spedar,
For thow was oure lyghte and oure ledar,
Þe hegheste of heuen hade þu hyght vs.
15.
Lucifer in inferno.Walaway! wa! es me now, nowe es it war thane it was.
Vnthryuandely threpe ȝhe, I sayde but a thoghte.
Secund. diab.
We! lurdane, þu lost vs.
Luc. in inf.
Ȝhe ly, owte! allas!
I wyste noghte þis wo sculde be wroghte.
Owte on ȝhow! lurdans, ȝhe smore me in smoke.
Secund. diab.
This wo has þu wroghte vs.
Luc. in inf.
Ȝhe ly, ȝhe ly!
Secund. diab.
Thou lyes, and þat sall þu by,
We lurdans haue at ȝowe, lat loke.
| The Barkers | |