University of Virginia Library

[OMITTED] [Isaac.]
Com nere son and kys me,
that I may feyle the smell of the.
The smell of my son is lyke
to a feld with flouris, or hony bike.
where art thou, Esaw, my son?

Iacob.
here, fader, and askis youre benyson.

Isaac.
The blyssyng my fader gaf to me,
god of heuen & I gif the;
God gif the plente grete,
of wyne, of oyll, and of whete;
And graunt thi childre all
to worship the, both grete and small;
who so the blyssys, blyssed be he;
who so the waris, wared be he.
Now has thou my grete blyssyng,
loue the shall all thyne ofspryng;
Go now wheder thou has to go.

Iacob.
Graunt mercy, sir, I will do so.

recedet iacob.
[Esaw advances.]
Esaw.
haue, ete, fader, of myn huntyng,
And gif me sythen your blyssyng.

Isaac.
Who is that?

Esaw.
I, youre son
Esaw, bryngis you venyson.

Isaac.
Who was that was right now here,
And broght me bruet of a dere?
I ete well, and blyssyd hym;
And he is blyssyd, ich a lym.

Esaw.
Alas! I may grete and sob.

Isaac.
Thou art begylyd thrugh iacob,
That is thyne awne german brother.

Esaw.
haue ye kepyd me none other
Blyssyng then ye set hym one?

Isaac.
sich another haue I none;
Bot god gif the to thyn handband
the dew of heuen & frute of land;
Other then this can I not say.

Esaw.
Now, alas, and walo-way!
May I with that tratoure mete,
my faders dayes shall com with grete,
And my moders also;
may I hym mete, I shall hym slo.

[Esaw retires. Rebecca advances.]
Rebecca.
Isaac, it were my deth
If Iacob weddeth in kynd of heth;
I will send hym to aran,
there my brothere dwellys, laban;
And there may he serue in peasse
till his brother's wrath will seasse.
why shuld I apon a day
loyse both my sonnes? better nay.

Isaac.
Thou says soth, wife; call hym heder,
And let vs tell hym where & wheder
That he may fle esaw,
that vs both hetis bale to brew.

[Iacob advances.]
Rebecca.
Iacob, son! thi fader & I
wold speke with the; com, stand vs by!
Out of contry must thou fle,
that Esaw slo not the.

Iacob.
Whederward shuld I go, dame?

Rebecca.
To mesopotameam;
To my brothere, and thyn eme,
that dwellys besyde Iordan streme;
And ther may thou with hym won,
to Esaw, myne other son,
fforget, and all his wrath be dede.

Iacob.
I will go, fader, at youre rede.

Isaac.
Yei, son, do as thi moder says;
Com kys vs both, & weynd thi ways.

et osculatur.
Iacob.
Haue good day, sir and dame!

Isaac.
God sheld the, son, from syn and shame!

Rebecca.
And gif the grace, good man to be,
And send me glad tythyngis to the.