The Episode of Longeus :: :: University of Virginia Library

Collapse All | Expand All expand section

The ij knygtys go with joseph to jhesus and stande and heldyn hym in þe face.
ijus miles
Me thynkyth jhesu is sewre anow
it is no ned his bonys to breke
he is ded how þinkyth ȝow
he xal nevyr go nor speke.

ius miles

We wyl be sure or þan we go
Of A thyng I am be-thowth
Ȝondyr is a blynd knyth I xal go to
And sone A whyle here xal be wrowth.

here þe knyth goth to blynde longeys and seyth

heyl sere longeys þou gentyl knyth
þe I prey now ryth hertyly

310

þat þou wylt wend with me ful wyth
it xal be for þi prow veryly.

longeus
Sere at ȝour comauwndement with ȝow wyl I wende
in what place ȝe wyl me haue
for I trost ȝe be my frend
lede me forth sere oure sabath ȝou save.

ius miles
lo sere longeys here is a spere
bothe long and brood and sharp a-now
heve it up fast þat it wore þere
for here is game show man show.

here longeys showyth þe spere warly and þe blood comyth rennyng to his hand and he Auantorysly xal wype his eyne.
longeys

O good lord how may þis be
þat I may se so bryth now
þis thretty wyntyr I myth not se
and now I may se I wote nevyr how
but ho is þis þat hangyth here now
I trowe it be þe mayndonys sone
and þat he is now I knowe wel how
þe jewys to hym þis velany han don.

here he ffallyth down on his knes.

Now good lord fforgyf me that
þat I to þe now don have
for I dede I wyst not what
þe jewys of myn ignorans dede me rave
Mercy mercy mercy I crye.