University of Virginia Library

Here xal annas shewyn hym-self in his stage be-seyn after a busshop of þe hoold lawe in a skarlet gowne and ouer þat a blew tabbard furryd with whyte and a mytere on his hed after þe hoold lawe ij doctorys stondyng by hym in furryd hodys and on be-forn hem with his staff of A-stat and eche of hem on here hedys a furryd cappe with a gret knop in þe crowne and on stondyng be-forn as a sarazyn þe wich xal be his masangere Annas þus seyng
Annas

primus doctor
Sere þis is myn Avyse þat ȝe xal do
Send to cayphas for cowncel knowe his intent
For yf jhesu proce and þus forth go
Oure lawys xal be dystroyd thes se we present.

ijus doctor
Sere remembre þe gret charge þat on ȝow is leyd
Þe lawe to ke which may not ffayle
Yf any defawth prevyd of ȝow be seyd
Þe jewys with trewth wyl ȝow a-sayl
Tak hed whath cownsayl may best provayl
After rewfyn and leyon I rede þat ȝe sende
They arn temperal jewgys, þat knowyth þe parayl
With ȝoure cosyn cayphas þis matere to Amende.

Annas

Arfexe
My souereyn at ȝour intent I xal gon
In al þe hast þat I kan hy
On to Cayphas rewfyn and lyon
And charge ȝoure intent þat þei xal ply.

here goth þe masangere forth and in þe mene tyme cayphas shewyth him-self in his skafhald Arayd lych to Annas savyng his tabbard xal be red furryd with white ij doctorys with hym arayd with pellys aftyr þe old gyse and furryd cappys on here hedys Cayphas þus seyng.
Cayphas

primus doct[or]
Myn lord plesyt ȝow to pardon me for to say
þe blame in ȝow is as we fynde
to lete cryst contenue þus day be day
With his fals wichcraft þe pepyl to blynde
He werkyth fals meraclis Ageyns all kende
And makyth oure pepyl to leve hem in
It is ȝour part to take hym and do hym bynde
And gyf hym jugement for his gret syn.

ijus doctor
For-sothe sere of trewth this is þe case
On to our lawe ȝe don oppressyon
Þat ȝe let cryst from ȝou pace
and wyl not don on hym correxion
Let Annas knowe ȝour intencion
With prestys and jewgys of þe lawe
And do cryst fforsake his fals oppynyon
Or in to A preson lete hem be thrawe.

Cayphas
Wel serys ȝe sal se with-inne short whyle
I xal correcte hym for his trespas
He xal no lenger oure pepyl be-gyle
Out of myn dawngere he xal not pas.

here comyth þe masangere to cayphas and in þe mene tyme rewfyn and lyon schewyn hem in þe place in ray tabardys furryd and rayhodys a-bouth here neckys furryd þe masangere seyng.
Masangere
Myn reverent souereyn and it do ȝow plese
Sere annas my lord hath to ȝou sent
He prayt ȝou þat ȝe xal not sese
Tyl þat ȝe ben with hym present.

Cayphas
Sere telle myn cosyn I xal not fayl
it was my purpose hym for to se
For serteyn materys þat wyl provayle
Þow he had notwth a sent to me.

Masager
I recomende me to ȝour hey degre
on more massagys I must wende.

Cayphas
Ffare wel sere and wel ȝe be
gret wel my cosyn and my ffrede

here þe masager metyth with þe jewgys sayng
Masager
Heyl jewgys of jewry of reson most prudent
of my massage to ȝou I make relacion
my lord sere Annas hath for ȝou sent
to se his presens with-owth delacion.

Rewfyn
Sere we Are redy At his comawndement
To se sere Annas in his place
it was oure purpose and oure intent
to A be with hym with-inne short space.

leyon
We are ful glad his presence to se
sere telle hym we xal come in hast
no declaracion þer-in xal be
but to his presens hye us fast.

masager
I xal telle my lord seris as ȝe say
Ȝe wyl ful-fylle al his plesawns.

Rewfyn
Sere telle hym we xal make no delay
but come in hast at his instawns.

here þe masangere comyth to Annas þus seyng
masan[ger]
My lord and it plese ȝou to haue intellygens
Ser Cayphas comyth to ȝou in hast
Rewfyn and lyon wyl se ȝour presens
And se ȝow here or þis day be past.

Annas
Sere I kan þe thank of þi dyligens
Now ageyn my cosyn I wole walk
Serys folwyth me on to his presens
Ffor of these materys we must talk.

here Annas goth down to mete with cayphas and in þe mene tyme þus seyng
Cayphas
Now on to annas let us wende
ech of vs to knowe otherys intent
Many materys I haue in mende
Þe wich to hym I xal present.

ius doctor C.
Sere of all othere thyng remembre þis case
Loke þat ihesus be put to schame.

ijus doctor C.
Whan we come present beforn annas
Whe xal rehers all his gret blame.

here þe buschopys with here clerkys and þe Pharaseus mett and þe myd place and þer xal be a lytil oratory with stolys and cusshonys clenly be-seyn lych as it were a cownsel hous Annas þus seyng
Annas

Cayphas
Be reson þe trewth here may we try
I cannot dem hym with-outh trespace
Be-cause he seyth in every A place
þat he kyng of jewys in every degre
þerfore he is fals knowe wel þe case
Sesar is kyng and non but he.

Rewfyn
He is An eretyk and a tretour bolde
To sesare and to oure lawe sertayn
Bothe in word and in werke and ȝe be-holde
He is worthy to dey with mekyl peyn.

leon
þe cawse þat we been here present
To fortefye þe lawe and trewth to say
Jhesus ful nere oure lawys hath shent
þerfore he is worthy for to day.

ius doctor An[nas]
Serys ȝe þat ben rewelerys of þe lawe
On jhesu ȝe must gyf jugement
Let hym fyrst ben hangyn and drawe
and þanne his body in fyre be brent.

ijus doctor An[nas]
Now xal ȝe here þe intent of me
Take jhesu þat werke us all gret schame
Put hym to deth let hym not fle
For þan þe comownys þei wyl ȝow blame.

ius doctor Cayp[has]
He werke with weche-crafte in eche place
And drawyth þe pepyl to hese intent
Be whare ȝe jewgys let hym not passe
þan be my trewthe ȝe xal repent.

ijus doctor Cayphas
Serys takyth hede on to þis case
and in ȝour jewgement be not slawe
þer was nevyr man dyd so gret trespace
As jhesu hath don Ageyn oure lawe.

Annas
Now bretheryn þan wyl ȝe here myn intent
These ix days let us A-byde
We may not gyf so hasty jugement
but eche man inqwere on his syde
Send spyes A-bouth þe countre wyde
to se and recorde and testymonye
And þan hese werkys he xal not hyde
nor haue no power hem to denye.

Cayphas
This cowncell A-cordyth to my reson.

Annas
And we All to þe same.