Moses :: :: University of Virginia Library

Collapse All | Expand All expand section

Introitus Moyses

He þat made all thynge of nought
Hevyn and erth both sunne and mone
Saue all þat his hand hath wrought
All myghty god in hevyn trone
I am Moyses þat make þis bone
I pray þe lord god with all my mende
to us incline þi mercy sone
þi gracyous lordchep lete us fynde.

The to plesyn in all degre
Gracyous god and lord ovyr all

þou graunte us grace wher so we be
and saue us sownd fro synfull fall
thy wyll to werke to us þi thrall
enforme and teche us all þi plesans
in purenesse put us þat nevyr not fall
and grounde us in grace ffrom all grevauns.

Hic moyses videns rubrum ardentem admirande dicit

A mercy god what menyth ȝon syte
A grene busch as fyre doth flame
and kepyth his colowre fayr and bryghte
Ffresch and grene with-owtyn blame
It fyguryth sum thynge of ryght gret fame
I kan not seyn what it may be
I wyll go nere in goddys name
and wysely loke þis busch to se.

Deus
Moyses how Moyses
herke to me a-non þis stounde.

Moyses
I am here lorde with-owtyn les
ȝowre gracyous wyll to do I am bounde.

Deus
Thu take þi schon anon ful rownde
of þi fete in hast lete se
fful holy is þat place and grownde
þer þou dost stonde I sey to the.

Moyses
Barfoot now I do me make
and pull of my schon fro my fete
now haue I my schon of take
what is ȝour wyll lord fayn wold I wete.

Deus

Come nere moyses with me to mete
these tabell-is I take þe in þin honde
with my ffynger in hem is wrete
all my lawys þou vndyrstonde.

Loke þat þou preche all abowte
hoo so wyll haue frenshipp of me

to my lawys loke þei lowte
þat þei be kept in all degre
Go forth and preche a-non let se
loke þou not ses nyght nor day.

Moyses

ȝour byddyng lord all wrought xal be
ȝour wyll to werk I walk my way.

Custodi precepta domini dei tui deutronomini vjt o.

The comaundement of þi lord god man loke þou kepe
where þat þou walk wake or slepe
Euery man take good hede
and to my techynge take good intent
for god hath sent me now in dede
ȝow for to enforme his comaundment
ȝow to teche god hath me sent
his lawys of lyff þat arn ful wyse
them to lerne be dyligent
ȝour soulys may þei saue at þe last Asyse.

The preceptys þat taught xal be
be wretyn in þese tablys tweyn
In þe fyrst ben wretyn thre
that towch to god þis is serteyn
In þe secund tabyl be wretyn ful pleyn
þe tother vij þat towch mankende
herk now well man what I xal seyn
and prent þise lawys well in þi mende.

1u s Primum mandatum non habebis deos alienos.

The fyrst comaundement of god as I ȝow say
of þe fyrst tabyl for sothe is this
þou xalt haue neythyr nyght nore day
noon other god but þe kyng of blysse
Vndyrstonde wele what menyth this
Euery man in hys degre
And sett neuyr ȝour hert a-mys
Vpon þis werdlys vanyte.

Ffor if þou sett þi loue so sore
Vpon ryches and werdly good
þi wurdly rycches þou takyst ever more
evyn ffor þi god as man ovyr wood
Amend þe man and chaunge þi mood
lese not þi sowle for werdlys welth
Only hym loue which bodyly ffood
doth ȝeve all day and gostly helth.

2. Secundum mandatum non assumens nomen dei tui in vanum.

The secund precept of þe fyrst tabyll
þe name of god take nevyr in vayne
Swere none othis be noon fals fabyll
þe name of god þou nevyr dysteyn
Be whare of othis for dowte of peyn
Amonges ffelacheppe whan þou dost sytt
A lytyl othe þis is serteyn
may dampne thy sowle to helle pytt.

Man whan þou art sett at þe nale
and hast þi langage as plesyth þe
loke þin othis be non or smale
and ȝett alwey loke trewe thei be
But swere not oftyn by rede of me
ffor yf þou vse oftyn tyme to swere
it may gendyr custom in the
by-ware of custom ffor he wyl dere.

3. Tercium mandatum memento vt sabbatum sanctificet.

The iijd e comaundment of god as I rede
doth bydde the halwe well þin haly day
kepe þe well ffro synfull dede
and care not gretly ffor rych a-ray
A ryght pore man þis is non nay
of sympyl astat in clothis rent
may-be bettyr than rych with garmentys gay
Oftyn tyme doth kepe þis comaundment.

Ffor rych men do showe oftyn tyme pompe and pride
On halydays as oftyn is sene

Whan pore men passe and go be-syde
At wurthy festys riche men woll bene
Thyn halyday þou kepyst not clene
In gloteny to lede þi lyff
In goddys hous ȝe xulde be-dene
honoure ȝour god both mayden and wyff.

4. Quartum mandatum honora patrem tuum et matrem tuam.

Off þe secunde tabyll þe fyrst comaundement
And in þe ordyr þe iiijt e I sey in fay
he byddyth þe euer more with hert bent
both ffadyr and modyr to wurchep Alway
Thow þat þi fadyr be pore of array
and þow neuer so rych of golde and good
ȝitt loke þou wurchep hym nyght and day
Of whom þou hast both fflesch and blood.

In þis comaundmente includyd is
thi bodyli fadyr and modyr also
Includyd also I fynde in þis
thi gostly fadyr and modyr þer to
To þi gostly ffadyr evyr reuerens do
þi gostly modyr is holy cherch
these tweyn saue þi sowle fro woo
euer them to wurchep loke þat þou werch.

5. Quintum mandatum non occides.

The ffyfft comaundement byddyth all us
Scle no man no whight þat þou kyll
Vndyr stonde þis precept þus
Scle no wyght with wurd nor wyll
Wykkyd worde werkyht oftyn tyme grett ill
be war þer fore of wykkyd langage
wyckyd spech many on doth spyll
therfore of spech beth not owt-rage.

6. Sextum mandatum non makaberis.

The sexte comaundement byddith every man
þat no wyght lede no lecherous lay

fforfet neuer be no woman
lesse þan þe lawe a-lowe þi play
Trespas nevyr with wyff ne may
with wedow nor with non othyr wyght
kepe þe cleue as I þe say
to whom þou hast þi trowth plyght.

7. Septimum mandatum non furtum facies.

Do no thefte no thynge þou stele
þe vijt e precept byddyth þe ful sore
whyll þou arte in welth and wele
euyll gett good loke þou restore
Off handys and dede be trewe euyr more
ffor yf þin handys lymyd be
þou art but shent þi name is lore
in ffelde and town and in all countre.

8. Octauum mandatum non loqueris contra proximum tuum falsum testimonium.

The viijt e precept þus doth þe bydde
Ffals wyttnes loke non þou bere
þe trowth nevyr more loke þat þou hyde
with ffals wyttnes no man þou dere
Nowther ffor love ne dred ne fere
Sey non other than trowth is
Ffals wytnes yf þat þou rere
Aȝens god þou dost grettly amys.

9. Nonum mandatum non desiderabis vxorem proximi tui et cetera.

The ixt e precept of lawe of lyff
evyn þus doth bydde every man
desyre not þi neyborys wyff
þow she be fayr and whyte as swan
And þi wyff brown ȝitt natt for than
þi neyborys wyff þou nevyr rejoyse
kepe þe clene as evyr þou can
to þin owyn wyff and þin owyn choyse.

10. Decimum mandatum non concupisces domum proximi tui non seruum non ancillam non bos non asinum nec omnia que illius sunt et cetera.

The xd e comaundement of god and last is þis
thi neyborys hous desyre þou nowth
Maydon nor servaunt nor nowth of his
desyre hem nevyr in wyll nor thowth
Oxe nere Asse þat he hath bought
nere no thynge þat longyht hym to
Godys lawe must nedys be wrought
desyre no thynge þin neybore ffro.

The vjt e comaundement of lechory
doth exclude þe synfull dede
but theys tweyn last most streytly
both dede and thought þei do for-bede
In wyll nere thought no lechory þou lede
þi thought and wyll þou must refreyn
All þi desyre as I þe rede
in clennes of lyff þi self restreyn.

Ffrendys þese be þe lawys þat ȝe must kepe
therfore every man sett well in mende
Wethyr þat þou do wake or slepe
these lawys to lerne þou herke ful hynde
And godys grace xal be þi ffrende
he socowre and saue ȝow in welth fro woo
Fare well gode frendys for hens wyll I wende
my tale I haue taught ȝow my wey now I goo.

Explicit moyses.