University of Virginia Library

Incipit prologus.

Ihereþ nv one lutele tale. þat ich eu wille telle.
As we vyndeþ hit iwrite. in þe godspelle.
Nis hit nouht of karlemeyne ne of þe Duzeper.
Ac of cristes þruwinge. þet he þolede her.
Al volk wes to-dreued. so schep beoþ in þe wolde.
Lute ymvnde. hi hedde of gode. heore heorten weren so colde.
He þet is. and euer wes. in heuene myd his fadere.
Ful lowe he alyhte. for bryngen heom to-gadere.
Þurst. and hunger. chele. and hete. þis beoþ stronge pyne.
Þeos he þolede al vor vs. þat turnde water to wyne.
Þrytty wyntre and more. he wes among Monkunne.
Seoþþe þat Mayde hyne yber. al wiþ-vte sunne.
Þo he hedde so longe ibeo. ine wrecche lyue þisse.
He wes swyþe of-longed. to his fader blysse.
Nouht for þan þat he nedde. in his godcunnesse.
Ac he wolde þat we myd him. boþe more and lesse.
Heo habbe scolde. and so we Mvwe. ne þerfþ þer non adrede.
Yf we vs wyteþ from heued-sunne. and doþ al by his rede.
Þe louerd þet alle þing ischop. to þere blysse vs brynge.
Nv bigynneþ vre tale. nys hit no lesynge.

Her beginneþ cristes þrowynge .i. sa passyun.

Leuedi þu bere þat beste child. þat euer wes ibore.
Of þe he makede his moder. vor he þe hedde ycóre.
Adam and his ofsprung. al hit were fur-lore.
Yf þi sune nére. iblessed þu beo þer-vore.
After þat he wes youlled. in þe flum iurdan.
Of þe prophete þat hatte seynt iohan.
Þe holy gost hyne ledde. vp in-to þe wolde.
For to beon yuonded. of sathanas þen olde.
Þer he wes fourty dawes. al wiþ-vte mete.
Þo he hedde heom yuast. þo luste hym éte.
Þer hym com sathanas. þat is ful of hete.
Mid his false wordes. he gon myd him to speke.
Aþre cunne wise. he vondi hyne bi-gon.
As he vondede Adam. and hyne ouer-com.
M[id] yuernesse and prude. and yssyng wes þat on.
He nuste nouht. þat he wes. boþe god and mon.
Þo seyde ihesu crist. þet is godes sune.
Ga abak sathanas. to hwan artu ycume.
Anon he hyne byleuede. more to vondy.
And þer comen engles. hym to seruy.
Þo he bygon to prechi. wel mylde weren his dede.
He ches hym twolue yuére. myd him vor to lede.
Summe hi weren wyse. and duden al bi his rede.
Ac on hyne bitrayede. þat et of his brede.
Alle men he tauhte to holde treowe luue.
Erest to god almyhti. þat is vs alle abuve.
Seþþe to luuye his euenyng. al so hym seolue wolde.
And euervich beo to oþpre. boþe treowe and holde.
Mvchel volk hym vulede. wyte ye for hwon.
Summe to beon hole. of vuele þet wes heom on.
Summe for beon yuedde. of lykamlyche vode.
And summe al for vuele. and for none gode.
Men he helde. and wymmen. a vele kunne wise.
Þe blynde he makede loki. and þe dede aryse.
Dumbe speke. Deue ihere. and þe holte gon.
Swich leche bi-vore hym. ne com her neuer non.
Þe Gywes and þe faryseus. þer-of hi hedden onde.
Þat swich leche wes ycume. in-to heore londe.
Hi seyden. he is a smyþes sune. ne beo we noht his frend.
Alle his wndres þat he doþ. is þureh þene vend.
Vor alle þe gode þat he heom dude. hi yolde him luþre mede.
Me seyþ his hwile he vor-leost. þat doþ for þe quede.
Al-so dude ihesu crist. vor vuele. he dude god.
Þer-vore hi at þen ende. schedden his swete blod.
Þo he com toward ierusalem. a palme sune-day.
Ne hedde he none robe. of fowe. ne of gray.
Ne he nedde stede. ne no palefray.
Ac rod vppe on asse. as ich eu segge may.
As he com in-to þe bureh. so rydinde.
Þe children of þe tune. comen syngynde.
Iblessed hi seyde mote he beo. þe cumeþ on godes nome.
Þe Gywes and þe fariseus. þer-of hi hedde grome.
Þo he com to þe temple. and wolde prechi.
He vunde þer-ynne chepmen. þet were mody.
Þeyh hi were prute. he heom vt drof.
Þe byspes and þe maystres. hi were swyþe wroþ.
And hym anon axede. hwy he so dude.
Vre louerd heom onswerede. anon yne þe stude.
Hit is iwrithe þat myn hus. is bede hus icleped.
And ye þeouene dich. hit habbeþ y-maked.
Þe maystres of þe temple. hi were swiþe prute.
For to vndernyme vre louerd. hi were euer abute
If he ouht prechede. to-yeynes þere lawe.
Þet heo hyne myhte wreye. and don of lyf-daye.
As hit neyhlechet to heore muchele feste.
Of alle þe twelfmoneþ. þat wes þe alre meste.
Hi nomen heom to rede. at heore motynge.
Hw hi myhten vre louerd. to þe deþe brynge.
At þe schere þursday. as ye mawen ihére.
Þo vre louerd wes isethe. to his supere.
He byheold abute. myd swiþe veyre chere.
And seyde to his disciples. þat þo myd hym were.
On me scal bitraye. þat nv is vre yuere.
Iwis hym were betere. þat he ibore nere.
Eueruych lokede to oþre. hi were sore of-dredde.
Hi nuste neuer bi hwich of heom. he hit iseyd hedde.
Þo queþen his disciples. on after on.
Louerd hi seyden alle. hwo is so hardy mon.
Þat durre þe bytraye. of vs eueruych on.
We willeþ to þe deþe. alle myd þe gon.
Þo seyde vre louerd crist. þat is ful of blysse.
Nymeþ gode yeme. þat ye nouht ne mysse.
Hwam ich biteche þat bred. þat ich on wyne wete.
He me schal bitraye. to nyht er he slepe.
He hit bitauhte iudas. þat alle hit myhte iseo.
Þer he wes bivoren him. and set on his kneo.
He hit et bluþeliche. and lokede ful brode.
And þe veond him on bi-com. myd þerylke snode.
Iudas þo onswerede. and spek myd vre dryhte.
Mayster. am ich þilke. þat þe wile so dyhte.
Þu hit seyst queþ vre louerd. and dest al þine Mihte.
And he hym vt iwende. al bi þuster nyhte.
He com to þe Gywes. þer heo to-gadere were.
Al hym seolf one. nedde he nenne yuere.
And chepte heom to sullen. vre helare.
Hi were swiþe blyþe. for þere cheffare.
He queþ to þe Gywes. if ich so ispede.
Þat ich bitraye ihesu. hwat schal beon my mede.
Þrytty panewes hi seyden. hi beoþ alle irede.
Cumeþ mid me queþ iudas. and ich eu wile lede.
Cvmeþ swiþe myd me. boþe yonge and olde.
Þene þat ich cusse. uaste ye hyne holde.
And ledeþ hyne warlyche. he con wndres monye.
If he nuþe eu askapeþ. eu schal sore schomye.
After þet iudas skariot. him wes vt igón.
Vre louerd nom his apostles. euervych on.
And forþ myd him ledde. to þe Munt of olyuete.
Þer he to heom wordes spek. myd his Muþe swete.
Ye seggeþ alle queþ vre louerd. ye willeþ myd me deye.
To nyht eu schal scomye. þat ye me euere yseye.
Hit is write in þe bok. þer me hit may rede.
Vele wintre hit is ágo. þe prophete hit seyde.
Beo þe seopheorde aquold. and of lyue bireued.
Þenne scule sone his seop. alle beon to-dreued:
After þat ich from deþe. eft aryse beo.
Ich wile bi-voren eu alle. cumen to Galyle.
Þo queþ seynte peter. þeyh alle of-schomed beo.
Ne schal me neuer schomye. louerd for þeo.
Peter. queþ vre louerd. nv þu seyst so.
Er hit beo day to morewe. al oþer hit schal go.
Þu ne knowest nouht þi seolue. ac ich þe yknowe.
Þu me schalt þryes fur-sake. er þe cok crowe.
Louerd queþ seynte peter. iwis hym wes ful wo.
Þeyh ich to þe deþe. schulle myd þe go.
Oþer in-to prysune. hweþer hit wile by-valle.
Ic nele neuer þe vorsake. and so hi seyden alle.
Þo hi hedden al þis iherd. heo were ful sori.
Vre louerd myd heom iwende. to geth-semany.
Seþþe he to heom seyde. iblessed mote heo beo.
Sytteþ her þe hwile ich go. to abidde me.
He nom seynte peter. seynt Iame. and seynt ion.
He wes of-dred. of þe deþ. þet is god and mon.
Wel ouhte we beon aferd. if we wyse were.
And vre sunnes bete. þe hwile we beoþ here.
Iesus from heom iwende. þe wrp of o ston.
And gon hyne to abidde. al him seolf on.
Vader he seyde ihesu crist. if hit may so beo.
Of þis ilche calche. nv forber þu me.
If ich hine schal drynke. iworþe þine wille.
He wyste þat þe Gywes. hyne þouhte spille.
As vre louerd hine ybed. he bi-gon to swete.
Þat blod orn adun of hym. dropes swyþe grete.
Þer com of heuene on engel. and stod hym vaste by.
Hyne vor to gladye. he wes ful redi.
Þo he hedde hyne ibede. one gode stunde.
He com to his apostles. and heom a slepe funde.
Slepestu he seyde symon. he wes on of þe þre.
Ne Myhtestu one tyde. wakien myd me.
Wakieþ and ybiddeþ eu. alle to-gadere.
Þat ye ne cumen in vondinge. vp to myne vadere.
Þe tyde is wel neyh icume. ich do eu to understonde.
And monnes sune biþ bi-tauht. in sunuulle honde.
Ariseþ vp he seyde. and vte we heonne go.
Þer him cumeþ iudas. þat is my fulle i-vo.
He me hafþ to nyht isold. euer wrþe him wo.
And alle þat oþer bitraye. nv and euer-mo.
Nedde he bute þet word iseyd. iudas him com þrynge.
Mid Gyues. and myd phariseus. from heore motynge.
Mid speres. and myd staues. and oþe vele þinge.
Lutle luue hi beren. to þen heuene kynge.
Iesus com to-yeynes heom. myd alle his ivere.
And he to heom seyde. hwam ye seche here.
Heo hym onswerede. ihesum nazaren.
Ihesuc heom to seyde; lo ich hit em.
Yf ye me secheþ. her ich am yfunde.
Leteþ þeos bileuen. hol and isunde.
Ne schullen hi nouht yete. þolie none wnde.
Þe Gywes myd þon worde. veollen to þe grunde.
Iudas com avoreward. þet al þat baleu wrouhte.
Mid Gywes. and oþer volke. þat he myd hym brouhte.
Heyl he seyde mayster. to ihesuc þat hi souhte.
And hyne myd Muþe custe. as he non vuel ne þouhte.
Freond seyde ihesu crist. to hwan er-tu ycume.
Mid þine valse cosse. þu trayest monnes sune.
Þe Gywes vp asturte. þat leyen in þe grunde.
And nomen anon ihesu crist. and hyne vaste bunde.
Seynte peter hedde o swerd. and he hit vt drouh.
And smot of Malkes ere. and nouht hyne ne slouh.
Þo iseyh ihesu crist. þat peter so dude.
Put in he seyde þi sweord. anon in þe stude.
Ne mot ich nouht drynke peter vor þe.
Þene calch þat my vader. haueþ y-yeue me.
Seoþþe him spek ihesu crist. iheried beo his Mihte.
And seyde to þe Gywes. nolde he nowiht vyhte.
Mid sweordes and myd bottes. ye beoþ her icume.
So me doþ to þeoue. þat schal beon ynume.
Vyche day in þe temple. wes myne ywune.
To techen eu godes lore. þer ye were summe.
Nes þo non so hardy. þat on me leyde honde.
Bute nv by nyhte. þet is for muchel onde.
Peter iseyh þe Gywes. vre louerd vaste bynde.
Anon he drouh hyne abak. and eode heom by-hynde.
Leste he were iknowe. he wes swiþe of-dred.
Noþeles he wolde iwite. hwuder he were iled.
Þe Gywes nomen ihesu crist. and forþ hine ledde.
Of alle his apostles. nenne help he nedde.
Alle heo hyne byleuede. so sore hi weren of-dredde.
As vre louerd þer-by-vore. heom iseyd hedde.
Heo brouhte hyne to kayphas. al wyþ-vte ivere.
Heo wes heore biscop. in þen ylke yere.
Of alle his disciples. ne vulede hym neuer on.
Bute seynte peter. and on yong mon.
Ion hedde enne mantel. of cendal hym abute.
He wende in myd ihesu crist. and peter stod þer-vte.
For he wes iknowe. he wes more bold.
He stod bi þe fure. and wermd hym for þe cold.
He bed þene dureward. lete in his i-vere.
Hi wolden heore louerdes dom. iseon and ihere.
Þe dureward hine in lette. al wyþ-vte mede.
Peter stod myd þon oþre. and wermede hym at þe glede.
Summe of þet þer weren. ykeneu seynt ion.
And nom him by þe mantel. þat he hedde vp-on.
He bileuede his mantel. in þes Gywes hond.
And him seolf al naked. at þere dure vt wond.
Er he were him at-broke. him þuhte ful long.
For þe dute of þe deþ. is swiþe strong.
Þo vre louerd wes ibrouht by-vore kayphas.
Þet mayster and byscop. in þan yere was.
Þe princes and þe phariseus. hi were swiþe blyþe.
Þo heo iseyen ihesu crist. hi þouhte hyne do of lyue.
A ueole kunne wise. hi lowen him vp-on.
To bryngen hyne to deþe. hi nusten vor hwon.
Þer arysen tweyne and bigunne to speke.
Þes seyde hwat he wolde. þe temple al to-breke.
Þat þe kyng salomon. makede ful yere.
And þene þridde day. him seolf a newa a-reáre.
Þis we iherde. her-of we bereþ witnesse.
Þo onswerede. þe more. and þe lasse.
Þeyh he nedde no more ydo. he ouhte hit for-beode.
Al his wndres þat he doþ. is þureh þene quede.
Cayphas spek to ihesu crist. he þouhte hine derye.
Ne herestu hwat þeos seggeþ. hwy neltu onswerye.
Ihesuc hym wes stille. nolde heo nowyht speke.
He Mihte if he wolde. ful sone hyne awreke.
Seoþþe he hym axede. of his techinge.
And of his disciples. and feole oþer þinge.
Vre louerd hym onswerede. myd swyþe veyre speche.
Ofte in þe temple. ich wes iwuned to preche.
Al by lyhte daye. þer men hit Mihte ihere.
And þu and oþre ynowe. þat weren þine ivere.
Hwat ich to heom seyde. wel wyten heo.
Iwyte at heom þat hit iherde. and nouht ne axe me.
Þer leop forþ ó gadelyng. as ye Mawen ihere.
And smot á-non ihesu crist. anvnder þat ere.
Hit is þe byscop he queþ. schal-tu so onswerie.
He is þe hexte of þere lawe. we hyne willeþ werie.
Ihesuc to hym seyde. and yef hym onswere.
If ich habbe vuele iseyd. witnesse þu myht bere.
And if ich habbe wel ispeke. þer-of þu nym gome.
And nouht me vor to beten. al wyþ-vte dome.
Þe Gywes þat heolde ihesu crist. Muchele schome him dude.
Blyndfellede. and spatten him on. in þen ilke stude.
And smyten vnder þat ere. and þus to him seyde.
Hwo is þat þe smot þo. constu hit arede.
Muchele schendnesse. hi duden vre dryhte.
For bryngen hyne to deþe. hi duden heore myhte.
Peter stod bi þe fur. he wes swiþe of-dred.
He iseyh hw ihesu crist. wes vuele biled.
Þer com o schelchene gon. þat wes myd kayphas.
Heo by-wste þe dure. þer al þat mot was.
Heo byheold peter. and seyde to heom þat sete.
Iwis þes is myd ihesu. þene prophete.
Peter þo onswerede. ne yknowe ich hyne nouht.
Neuer er ich hyne ne yseyh. þu ert mys-by-þouht.
Sone her-after. on oþer þer com gon.
And seyde. siker þu ert myd him. a galilewis mon.
Mon. queþ seynte péter. y not hwat seyst þu.
Ne ikneu ich hyne neuere. ne y-seyh bute nv.
Þo onswerede on oþer. þet wes hire yvere.
He wes Malkes kunes-mon. þet peter smot of þat ere.
Iwis þu were myd ihesu crist. in þe leyhtune.
Ich iknowe þe ful wel. þer he wes y-nume.
Peter. at-sok and seyde. awaryed mote heo beo.
Þat euer hyne iknewe. ich segge vor me.
Nedde he bute þet word iseyd. þe cok crowe bi-gon.
Ihesuc hyne bywende. and lokede him vp-on.
Peter. a-non þer-after. hyne vnder-stod.
Hwat his louerd hedde iseyd. he wes sori-mod.
Anon he vt iwende. and bigon to wepe.
Þeyh he hedde his louerd fur-sake. he þouhte for to bete.
Anon an ernemorewe. so sone so hit wes day.
Hi comen alle to-gadere. as ich eu seggen may.
Þe Gywes and al þat oþer volk. hi weren swiþe vóuse.
And brouhten vre louerd crist to heore mothuse.
Heo him to seyden. nv þu ert her ibrouht.
Say vs nuþe if þu ert crist. þat we habbeþ isouht.
Vre louerd heom onswerede. þeyh ich eu segge soþ.
Ye nelleþ me nouht iléue. ich hit wot inouh.
If ich eu ouht axi. ye nelleþ me nouht telle.
Ne lete me gon quite. ye þencheþ me to quelle.
Þer-vore ich ine heuene. schal sytte by myne vadere
And seþþe cumen and deme. eu alle to-gadere.
Þo sayden hi alle. þenne er-tu godes sune.
Ye hit seggeþ for ich hit am. þer-vore ich am ynume.
Þis iherde kayphas. his weden he to-brek.
And seþþe to þen volke. þeos wordes he spek.
Hwat abyde ye nuþe. to habben mo wytnesse.
Alle ye habbeþ þis iherd. þe more and þe lesse.
Hw he haueþ her ispeke. hwat is eur red.
Alle hi onswerede. he is wrþe to beo ded.
Seþþe hi alle arysen vp. and forþ hyne ledde.
Of þe kynge of heuene. none reuþe hi nedde.
Heo brouhten hyne to pylates. þet wes heore herre.
Herkne nv hi seyden. we nelleþ þe nouht bicherre.
Þesne mon we funde. vorbeoden vre lawe
Þat we nv and vre eldre. heolde by olde daye.
Muchel of vre volke. he haueþ iturnd þer-from.
He seyþ þat he is godes sune. and is a dedlich mon.
And he vor-beod cesares gauel. of alle kunnes þing.
He yelp to-vore vs alle. þat he is vre king.
Pilates queþ to ihesu crist. seye þu me soþ
Yf þu ert gywene kyng. oþer hi habbeþ woh.
Þu hit seyst queþ vre louerd. þat ich am godes sune.
Inot for hwiche gulte. hi me habbeþ inume.
Pilates him vt iwende. þer-after ful sone.
He seyde. hwat haueþ þes mon i-do. þat is ibrouht to me.
Þe Gywes him onswereden. if he nedde mys-do.
Nere he nouht for vs inume. ne ibrouht þe to.
Pylates heom to seyde. after eure lawe.
Þat yet nv habbeþ. and heolde bi olde dawe.
Demyþ hyne nuþe. oþer leteþ hyne beo.
Nenne gult of deþe. ich on hym i-seo.
Þe Gywes onswerede. after vre lawe.
We ne mote nenne mon. do of lyf-dawe.
Pilates eft iwende him in. þer vre louerd stod.
Þe gywes were ful bysie. to scheden his blod.
Pilates clepede vre louerd. and þus hym seyde to.
Þu ert gywene kyng. þeyh hi þe schome do.
Vre louerd him onswerede. iblessed mote he beo.
Hweþer seystu hit þi seolf. oþer oþre hit seyde by me.
Pilates hym onswerede. am ich Gyv þenne.
Þe byspes þe me bitauhte. and mo of þine Menne.
Hwat hauestu i-do. for hwan ertu i-nume.
Ihesuc him onswerede. seynte Marie sune.
Yf Mi kyneriche were ine worlde þisse.
Mine men wolde wyþstonde. wite þu myd iwisse.
Þat ich nere nouht bi-tauht. in gywene honde.
Ac my kyneriche. is in oþer londe.
Pilates þo him seyde. þenne er-tu kyng.
Þu hit seyst queþ vre louerd. nabbe ich non euenyng.
Ich þer-on am ibore. and to þis world i-cume.
And bere witnesse of soþe. þer-vore ich am i-nume.
Alle þat beoþ in soþe. i-hereþ myne word.
And heo wel atholdeþ. and leggeþ ine hord.
Þo seyde pilates him to. hwat is soþnesse.
Vre louerd ne onswerede. more ne lesse.
Pilates eft vt eode. and bileuede ihesus.
And com to þan volke. and seyde to heom þus.
Ine vynde nenne gult in þisse monne.
Hit is eur kustume. to habbe quyt enne.
At eure Muchele feste. euervyche yere.
Schal ich þere gywene kyng. lete gon al skere.
And hi alle gradden. pilates vp-on.
Nouht hyne hi seyden ac yef vs barraban.
Barraban wes a þeof. þer-vore he wes i-nume.
And myd oþer þeoues. i-do ine prysune.
Pilates nom þo ihesu crist. and hyne heyhte bete.
Þat al his swete likame. of blode gon to swete.
Þe knyhtes hyne nomen. and in hyne ledde
And duden al of his cloþes. þet he on hym hedde.
Seþþe hi nomen a red cloþ. and duden him a-bute.
And one yerd on his hond. and gunnen him a-lute.
Of one wrase of þornes. he wryþen hym one crune.
Of þan alre kennuste. þat grewen in þe tune.
Hi setten heo on his heued. and vaste þer to-beote.
On eueryche halue. þat blod gon vt yeote.
Seþþe hi knowede and seyde. hayl gywene king.
And smyten vnder þat ere. ne sparede hi no þing.
Pilates eft vt eode. and to þe gywes seyde.
Lo her ich brynge þisne mon. and to-vore eu lede.
Ich nenne gult ne vynde on him. i do eu to vnderstonde.
He wuste þet he wes i-nume. vor heore muchel onde.
Vre louerd ber his crune. and com him vt gon.
Lo seyde pilates. her is þes ilke mon.
Þe byspes and þet oþer volk. gradden him vp-on.
Do a rode do a rode. hi seyden. hyne a-non.
Pilates þo onswerede. and þus heom seyde to.
Nymeþ hym eu seolue. and on rode do.
Þe gywes hym onswereden. we habbeþ vre lawe.
Þer-after he schal beo i-don. vt of lyf-dawe.
Vor he makeþ him godes sune. we holdeþ hyne a-med:
Pilates þeos word iherde. þo wes heo more of-dred.
He iwende eft ayeyn. þar he wes ere.
And axede þo ihesu crist. hwenene heo were.
Vre louerd ne yef nenne onswere. ac stod him al stille.
He myhte sone hyne awreke. if hit were his wille.
He ne onswerede hym nowiht. iblessed beo he.
Pilates to hym seyde. þu ne spekest nouht wiþ me.
Nostu þat ich habbe myhte. on rode to do þe.
And ich habbe myhte. to lete þe quyte beo.
Vre louerd him onswerede. neddestu none myhte.
Me vor do to deþe. myd wowe ne myd ryhte.
Bute hit were þe iyeue. wite þu to iwisse.
Of him þat is vs alle abuue. in heueryche blysse.
Vor þan he more sunne hafþ. nuþe of me.
He þat me bitrayde. and seþþe bitauhte þe.
Þer-after pilates þouhte. to leten hyne go.
Ac þe gywes him seyden. euer wurþe heom wo.
If þu þysne bileuest. and hine letest so.
Ner-tu nouht cesares freond. ac ert his ivo.
Eueruych mon þat makeþ hym king. we hit seggeþ þe.
He wyþ-seyþ cesare. no king nys bute he.
Pilates ladde vt ure louerd. he nolde no leng abyde.
Þet wes a longe vryday. at þare sixte tide.
And seyde to þon gywes. lo her eur kyng.
Do hine awey hi gredden. an-hong an hying.
Pilates heom onswerede. and þus heom seyde to.
Wille ye þat eur king. on rode beo i-do.
Þe bispes þo onswereden. and seyden to him þar.
We nabbeþ nenne oþer king. bute cesar.
Pilates nom þo vre louerd. and heom bitauhte on honde.
Heo hine bitauhte knyhtes. þat duden him muchele schonde.
Þe knyhtes þet hine ledden. bitauhten him þe rode.
Þer-on he deþ þolede. and bouhte vs myd his blode.
He ber heo on his schuldre. toward þan ilke stude.
Þat hatte kaluarie. þer-on hi hine dude.
Þo he wes on þe rode idon. þe gywes were ful gled.
Hi nome twey þeoues. þat weren myd him iled.
Þene enne hi honge in one half. for to don him teone.
And on bi þat oþer half. and ihesuc heom bitweone.
Vre louerd þo þis seyde. þat is ful of soþ.
Vader vor-yef heom þisne gult. hy nvten hwat hi doþ.
Þo ihesuc wes vppe þe rode. þat þolede pyne strong.
Þe knyhtes nome his cloþes. to delen heom a-mong.
Þo funden heo his curtel. þat he wes al ihol
Hi nolden þer-of makie. nones cunnes dol.
Ac hi casten heore lot. hwes he scolde beo.
Hi nolden hyne nouht delen. a to ne a þreo.
Þe princes and þet oþer volk. hokerede him vp-on.
Þes hi seyde haueþ iheld. mony en oþer mon.
Crist þet oþer hauest iheld. kyng of yrahel.
Help nv þi seolue. for þu myht ful wel.
Yf þu ert so myhti. so þu seyst þat þu beo.
Lyht a-dun of þe croyz. þat we hit alle iseo.
On of þe þeoues þat him heng by.
He seyde to vre louerde. and gon him hokeri.
Crist help þi seolue. and eke help vs.
Þe oþer him onswerede. and to him seyde þus.
Þv nert wrecche of góde of-dred. þat her ert anhonge.
We after vre gultes. mede habbeþ yuonge.
Þes þet vppe þe rode is neuere vuel ne dude.
He seyde to vre louerde. a-non in þe stude.
[L]ouerd he seyde þench on me. and bi-gon to syche.
Hwenne þu cumest to heuene. þer is þi kyneriche.
Ihesuc him onswerede. soþ ich segge þe.
To day in paradyse. þu schalt beo myd me.
Pilates wrot him seolf. a wryt. al on hying.
Þar is ihesuc of nazareth. þe gywene kyng.
Monye gywes hit radden. and were swyþe grym.
Hit wes iwryten on ebreu. on gryv. and latyn.
Þe bispes of þe gywes. seyden pilates to.
Þu ne schuldest nouht þi wryt. habben iwryte so.
Ne wryt þu nouht. her is þere gywene kyng.
Þeyh he seyde þat he hit wes. hit is lesyng.
Pilates þo onswerede. and þus heom seyde to
Þet ich wrot beo iwryte. ne may hit nomon vn-do.
Hit wes welneyh mydday. þo þusternesse com.
In alle Middenherde. fort þet hit wes non.
Þe sonne bileuede hire lyht. and þe mone al so.
Þat huding-cloþ to-delde in þe temple a to.
Ihesuc him gon clepyen. myd stefne uul stronge.
Vader ich myne soule biteche in þyne honde.
Þo he hedde so yseyd. þat scop þe sunne and mone.
He deyede þer-after. wel swiþe sone.
Þet iseyh centurio þat þer bisydes stod.
Hw vre louerd gon deye. þat bouhte vs myd his blod.
He seyde to þe knyhtes. þat weren his ivere.
Iwis þes mon wes godes sune. þet we iseoþ here.
Þe gywes to pilates comen and þus him seyden to.
We biddeþ þat heore þyes. beon to-broken a to.
And seoþþe let heom don a-dun. of þe waritreo.
Vor vre muchele feste to morewe schal beo.
Of þen one þeoue hi breken his þyes a to.
And of his yuere. hi duden al so.
Þo heo comen to ihesu crist. and seyen hine ded.
Ne breken hi nouht his þyes. þe bok hit for-bed.
Hi bitauhte one knyhte. a sper on his hond.
And setten to his syde. hit wes sarp and long.
He schef hit myd strenkþe. þat to his heorte hit com.
Boþe blod and eke water. þer-after vt ron.
Þe ilke þat hit iseyh. he wrot þis god-spel.
Þat he soþ segge. we leueþ hit ful wel.
Þo hit wes wel neyh eue. ioseph þer com gon.
Of arymathia. he wes a riche mon.
He com to pilates. and sayde to him þus.
Yef me þes prophetes body. þat hatte iesus.
Þo heyhte pilates. þat body him bi-teche.
Of vre louerd ihesu crist. þat is soule leche.
Ioseph nom vre louerd. a-dun of þe rode.
And wond him on o cheysil cloþ. þet bouhte us mid his blode.
Seoþþe he hyne leyde in one þruh of stone.
Þat he hedde newe imaked. to him self one.
He hwelfde at þare sepulchre-dure. enne grete ston.
Seþþe he wende forþ his wey. hwer he hedde to gon.
Þene oþer day þer-after. þat ihesuc crist wes ded.
Þe gywes and þe phariseus. nomen alle enne red.
Hi comen to pilates. þen maystre of þe londe.
Louerd hi to hym seyde. we beoþ vnderstonde.
Þes ilke swike seyde. for hwan we beoþ vnblyþe.
Ich wile þene þridde day. aryse from deþe to lyue.
Let wite þe sepulchre. fort þene þridde day.
Þat his disciples hine ne stele. and beren hyne away.
And seggen to þe volke. þet beoþ of vre lawe.
He is aryse from deþe. þet gywes hedden islawe.
Þenne wrþ þe laste dwele. wurse to alegge.
Þene þe vorme were. hwat euere men segge.
Pilates heom onswerede. þat wes i-cume of rome.
Goþ nv and wyteþ. hyne. wel hyedliche and sone.
Þe gywes þo uorþ wende. and nomen heore knyhtes.
To witen þe sepulchre. boþe a day and nyhtes.
Seþþe hi dude heore sel. vpe þene ston.
Lutel hi wiste wrecches. hw hit sculde gon.
Þe gywes weren wode. þat yeuen þene red.
And wende holde ihesu crist. þeyh he were ded.
Nu wolden heo hyne at-holden. þat scop alle þing.
Ne to-brek he helle dure. and ouercom heore king.
Iesus þo his wille wes. aros from deþe to lyue.
Þeyh hyne bi-wusten knyhtes voure oþer vyue.
Hwy nolden hi hine at-holden. so þe gywes redde.
Ne hi ne myhten hyne iseon. so hi weren of-dredde.
Of þen engel þet þer com. þo hi iseyen þat lyht.
Hi vellen so hi were ded. a-non vorþ riht.
Iesus crist þet suo aros. þurh his muchele myhte.
And com in-to þis myddenerd. sunfulle men to ryhte.
Lete us so vre lyf. in þis world dihte.
Þat we mote alle cumen. to þan eche lyhte.
Bidde we alle leoue men. god þat is so hende.
Þat he of þe holy gost. so vre heorte a-tende.
Þat we mote at vre scrift. þane veond schende.
Þat myd fule sunnes. vs þencheþ alle a-blende.
And yef þat eche lif. þat neuere ne haueþ ende.
Hwanne vre soule vnbynd. of lykamlyche bende.