The Minor Poems of John Lydgate :: :: University of Virginia Library

[This was the first cours at his coronacion, that is to say, first, ffurmentie, with venyson. Viande Royal plantid with losenges of golde. Borehedes in castelles of earmed with golde. Beef. Moton. Signet. Capon stued. Heron. Grete pike. A redde lech with lions corven theryn of white. Custade Rooial with a leparde of golde sittyng theryn. Fritour like a sonne with a flour de lice therynne. A sotelte, Seint Edward and Seint Lowes armed in cote armours bryngyng yn bitwene hem the Kyng in his cote armour with this scripture suyng:]

1

Loo here twoo kynges righte perfit and right good,
Holy Seint Edwarde and Seint Lowes:
And see the braunch borne of here blessid blode;
Live, among Cristen moost souereigne of price,
Enheretour of the floure de lice!
God graunte he may thurgh help of Crist Ihesu
This sixt Henry to reigne and be as wise
And hem resemble in knyghthod & vertue.

[Here foloweth the second course; that is to wite: Viande blank, barrid of golde. Gely partid writen and notid Te Deum Laudamus. Pigge endored. Crane. Bitore. Conyes. Chikyns endored. Partrich. Pecok enhakyll. Greate breame. Leches white with an antelop of redde corven theryn, a crowne about his neck with a cheyne of golde. Flampayne poudred with lepardis and floure de lices of golde. Fritour, a lepardis hedde with ij ostrich fethers. A sotelte, themperour and the kyng that ded is, armed, and here mantelles of the garters; and the kyng that nowe is, knelyng bifore hem with this reasoun:]

2

Ageinst miscreauntes themperour Sigismound
Hath shewid his myght which is imperial;
Sithen Henry the Vth so noble a knyght was founde
For Cristes cause in actis martial;

624

Cherisshyng the Chirch Lollardes had a falle,
To give exaumple to kynges that succede
And to his braunche in especiall
While he dothe regne to love God & drede.

[The iijd course sueth; that is to say:—Blaunde Surrey poudrid with quatrefoilis gilt. Venyson rostid. Egrettes. Curlewe. Cokkes. Plover. Quailis. Snytes. Grete birdes. Larkes. Carpe. Crabbe. Lech of iij colours. A colde bakemete like a shelde quarterly redde and white, set with losenges & gilt, and floures of borage. Fritour crispes. A sotelte of Our Lady sittyng and hir Childe in hir lappe, and she holdyng in hir hand a crowne and Seint George knelyng on that oo side and Seint Denyse on that other side, presentyng the Kyng, knelyng, to Our Lady, with this reason folowyng;]

3

O blessid Lady, Cristes moder dere,
And thou Seint George, þat callid art hir knight;
Holy Seint Denyse, O martir moost entier,
The sixt Henry here present in your sight,
Shewith of grace on hym your hevenly light,
His tendre yougth with vertue doth avaunce,
Bore by discent and by title of right
Iustly to reigne in England and in Fraunce.