LXXVIII.
[1]
God, folke come in þin eritage; sothli
Þai fortrade þi kirke hali;
Ierusalem set þa
In yheminge of apples ma.
2
Þai set dedelike of þi hyne euen
Metes of þe foghles of heuen,
Flesches of þine haleghs ware
To bestes of erthe þat are.
3
Þai yhotten blode als watre strem
In vmgange of Ierusalem,
And þar aboute was it nane
Þat walde biry lepi ane.
4
Vpbraidinge ere we made al tide
Til our neghburghs vs biside,
Snerynge and heþinge fullang
To þas þat ere in our vmgange.
5
Towhen, lauerd, saltou wreth in ende?
Kyndled sal be þi loue als fire þat brende?
6
Yhete þi wreth in genge þat noght knewe þe,
And in rikes þat þi name noght kald to se;
7
For þai ete Iacob ilka lim,
And vnroned þe stede ofe him.
8
Ne mine of our alde wickenesses, for-þi;
Tite vmgripe vs þi merci,
For þat poure made ere we
Swithe mikel opon to se.
9
Helpe vs, god, oure hele es þus;
And for blis of þi name lese vs,
And winsom to oure sinnes be,
For þi name þat es so fre.
10
Leswhen in genge þai sai:
“Whare es þar god in wham leue þai?”,
And in berthes vnknawen be,
Bifore oure eghen, þat we se,
11
Wreke of blode, when þat þou wilte,
Of þine hyne þat es so spilte.
Inga in þi sight to seene
Sighynge of fotefestes þat beene;
12
After þe mikelhed of þin arme
Agh sones of dedelike þat haue harme;
13
And yhelde til oure neghburs balde
In þair bosum seuenfalde
Vpbraidinge of þa þat be,
Þat þai vpbraided, louerd, to þe.
14
And we, þi folke, and schep of þi fode al,
In werld to þe schriue we sal;
15
In getinge and in getinge
Schew sal we þi louinge.
