LXXVI.
[1]
With mi steuen cried .i. to lauerd, with mi steuen
To god, and he biheld to me euen.
2
In þe daie of mi drouynge
Soght .i. god of alle thinge,
With mi hend ogaine him bi night;
And biswiked .i. am nawight.
3
Forsoke mi saule roned to be:
.I. was mined of god with me,
And .i. am lusted; and fered am .i.,
And mi gaste waned for-þi.
4
Vmgriped min eghen wakynge;
.I. am droued, and .i. spake nathinge.
5
.I. thoght daies alde þat nou ere noght;
And yheres of ai .i. had in thoght.
6
And .i. thoght bi night with mi hert maste,
And .i. swanke, and .i. swepid mi gaste.
7
“Whethir in ai god forwerpe sal?
Or noght set þat .i. queme yhit with-al?
8
Or in ende awai kerue mercy his,
In getynge and getynge þat is?
9
Or sal forgete to mylthe god ouer al?
Or his rewthis in his wreth withald he sal?”
10
And .i. saide: nou bigan .i. negh;
Þis wendynge of righthand hegh.
11
.I. Mined of werkes of lauerd for-þi,
For fra biginninge of his wondres mine sal .i.;
12
And .i. sal thinke in his werkes alle,
And in his findynges be woned .i. salle.
13
God in his hali wai:
Wha god mikel als oure god ai?
Þou ert god, and other nane,
Þat dos wondres manyane.
14
Kouth made þou forto be
In folke þe mikle might of þe.
Þou boght in þin arme þi folke at kep,
Sones of Iacob and of Iosep.
15
Watres sagh þe, god; watres sagh þe,
And dredes; and droued depenesse be.
16
Miklehed ofe din of watres ma;
Steuen gafe þe cloudes swa.
17
Sothlike þin arwes forthferd wele;
Steuen of þi thoner in a whele.
18
Lightned þi brightnes to werld þis;
Þe erthe qwoke and stired it is.
19
In fele watres þi styes, and in see þi wai,
And þine steppes noght knawen er þai.
20
Þou ledde als schepe þi folke on-one,
In hand of Moises and Aarone.
