 | The Skynners |  |
[Scene IV]
entrance to Jerusalem; the Porter still with the citizens.
70.
Pet.Porter, take here þyn asse agayne,
At hande my lorde comys on his fette.
Jani.
Behalde, where all þi Burgeis bayne
Comes with wirschippe hym to mete.
Þerfore I will
Late hym abide here in þis strete,
And lowte hym till.
71.
i Burg.Hayll! prophette, preued withouten pere,
Hayll! prince of pees schall euere endure,
Hayll! kyng comely, curteyse and clere,
Hayll! souerayne semely to synfull sure,
To þe all bowes.
Hayll! lord louely, oure cares may cure,
Ha[y]ll kyng of Jewes.
72.
ii Burg.Hayll! florisshand floure þat neuere shall fade,
Hayll! vyolett vernand with swete odoure,
Hayll! marke of myrthe, oure medecyne made,
217
Hayll! kyng comely.
Hayll! menskfull man, with þe honnoure
With herte frely.
73.
iii Burg.Hayll! dauid sone, doughty in dede,
Hayll! rose ruddy, hayll birrall clere,
Hayll! welle of welthe may make vs mede.
Hayll! saluer of oure sores sere,
We wirschippe þe.
Hayll! hendfull, with solas sere,
Welcome þou be!
74.
iv Burg.Hayll! blissfull babe, in Bedleme borne,
Hayll! boote of all oure bittir balis,
Hayll! sege þat schoppe boþe even and morne,
Hayll! talker trystefull of trew tales.
Hayll! comely knyght,
Hayll! of mode þat most preuayles
To saue þe tyght.
75.
v Burgh.Hayll! dyamaunde with drewry dight,
Hayll! jasper gentill of Jewry,
Hayll! lylly lufsome lemyd with lyght,
Hayll! balme of boote, moyste and drye,
To all has nede.
Hayll! barne most blist of mylde Marie,
Hayll! all oure mede.
76.
vi Burg.Hayll! conquerour, hayll, most of myght,
Hayll! rawnsoner of synfull all,
Hayll! pytefull, hayll! louely light,
Hayll! to vs welcome be schall.
Hayll! kyng of Jues;
Hayll! comely corse þat we þe call
With mirþe þat newes.
77.
vii Burg.Hayll! sonne ay schynand with bright bemes,
Hayll! lampe of liff schall neuere waste,
218
Hayll! texte of trewthe þe trew to taste.
Hayll! kyng & sire,
Hayll! maydens chylde þat menskid hir most,
We þe desire.
78.
viii Burg.Hayll! domysman dredful, þat all schall deme,
Hayll! quyk and dede þat all schall lowte,
Hayll! whom worschippe moste will seme,
Hayll! whom all thyng schall drede and dowte.
We welcome þe.
Hayll! and welcome of all abowte,
To owre cete.
| The Skynners | |