LXVII.
[1]
Rise god, and skatered his faas be;
And þat him hated, fra his face fle.
2
Als wanes reke, als wane þa;
Als meltes wax face of fire fra,
Swa sinful forworthe þai
Fra þe likam of god in ai.
3
And rightwise ete, and glade in sighte
Of god, and like in fainnes righte
4
Singes to god, salme saies to his name;
Waie makes to him, þe same
Þat vpstegh ouer setelgange;
Lauerd name to him be lange.
5
Glades in his sighte to seen:
Fra his face sal letted been;
Of fadre of foundlinges ma,
Of domesman of widous swa.
6
God in his hali stede; god þat inwon
Makes in hous of a won;
7
Þat outeledes bonden-in-wa
In stalworthede in for to ga,
Als-swa þai þat smertes ai,
Þat herde in throghtes night and dai.
8
God, when þou gas in sight of þi folke es,
When þou forthfares in wildernes,
9
Þe erthe es stired: for þat heuen
Droppes, fra þe face ful euen
Of god of Sinay somdel,
Fra face of god of Irael.
10
Wilful raine sundre þou sal
Vntil heritage þine al;
Sothlik vnfest es ite yhite:
For þat, þou fulmaked ite.
11
Þine bestes erde in it sal nou;
In swetnes, god, to poure graiþed þou.
12
Lauerd sal gif worde to godspelland,
With mikel might, in ilka land;
13
Of loued of loued al-mighti kinge;
And of wlite hous twinne robed thinge.
14
If ye slepe bitwix middes clerkes,
Of feþre of douue of siluered werkes,
And baft of bak of him be
In golnes of gold to se.
15
Whil schedes of ai lastand kinge
Oure it, for-bi ani thinge
Snawe whittened in Selmon be þa,
Godes hille, hil fat als-swa;
16
Lopered hil, hil fat als-swa.
Whi ilhope ye lopered hilles ma?
17
Hil in whilk welqueminge yhite
Is to god to won in ite;
For þat sothlike lauerd þat is
Wone in ende he sal with blis.
18
Goddes wayne to tenthousande
Felefalded, thousandes of fainande;
Lauerd he is ai in þa
In Sinay in halw swa.
19
Þou stegh in heght, toke wrecchednesse,
Name giftes in men mare and lesse:
20
For noght leuand night ne dai
Inwon lauerd god suld þai.
21
Blissed lauerd to-dai, ilkedai! smart wai
Sal make to us god of oure heles ai.
22
God our god sauf of makand qued;
And of lauerd of lauerd outgang of ded.
23
Bot god sal breke heuedes of his ilwilland,
Scalp of hare in þair giltes gaand.
24
Saide lauerd: “of Basan torne, torne sal .i.
In depnesse of þe se; for-þi
25
Þat þi fote be lited in blode o lim,
Þe tunge of þi hundes fra faas, of him”.
26
Þai sagh þi steppes, god, steppes of god mine,
Of mi king, þat halw es ine.
27
Bifor come princes samened to sing-and þar,
In midde wenches of timpans war.
28
In kirkes lauerd blisses wele,
Lauer[d] of welles of Iraele.
29
Þare Beniamin, yhongest es he,
In outgang of thoght to be;
30
Princes of Iuda forthga þai,
Dukes of þa, with am ai;
Princes of Ȝabulon wele ma,
Princes of Neptalim als-swa.
31
Sende, god, to mighte þine þus;
Fest, god, þat whilke þou wroght in vs.
32
Fra þi kirke in Ierusalem,
Sal bede giftes kinges to þe als lem.
33
Snibbe bestes of rede þat are,
Sameninge of bules lesse and mare
In kye of folke, þat outsteke þa
Þat fanded er with siluer swa.
34
Scater genge þat fightings wilen al.
Come legates fra Egipte sal;
Ethiop bifor come sal he,
Hand of him to god to be.
35
Rikes of erthe, to god yhe singe;
Salmes to lauerd of alle thinge;
36
Salmes to god, þat vpstegh mest
Our heuen of heuen, vnto þe este.
37
Loke, he sal giue vnto his steuen
Steuen of might: giues blisse ful euen
To god of Irael; mikelnes his
And might of him in kloudes is.
38
God in his haleghs selkouth to se;
God of Irael giue sal he
Might and strenghte to his folke al.
Blissed god, þat liue sal al!
