L
[1]
God, þou haue mercy of me,
After mikel mercy of þe;
2
And after of þi reuthes þe mikelnes
Þou do awai mi wickednes.
3
Noumare me wasche of min iuel bidene,
And of mi sinne þou klens me klene.
4
For mi wickenes .I. knaw þat .I. am inne,
And ai ogain me es mi sinne.
5
To þe an sinned .I. mare,
And iuel bifor þe dide .I. þare;
Þat in þi saghes þou be rightwise,
And ouercome when þou demed is.
6
Lo for in wickenesses onfanged am .I.,
And in sinnes me onfogh (!) mi modre for-þi.
7
Lo for þou loued with al þi mighte
Sothnes, bath bi dai and nighte;
Vnsiker and derne of þi wisdam
Þou opened vnto me ofe þam.
8
Þou sal strenkil me ouer-alle
With strenkil, and klensed be .I. salle;
Þou þi-selfe salt wasche me,
And ouer snawe sal .I. whitened be.
9
To mi heringe saltou giue
Blis and fainnes, whils .I. liue,
And glade sal þai night and dai
Banes þat ere meked ai.
10
Þi face fra mine sinnes torne þou nou,
And alle mi wickenes awai do þo[u].
11
Clene herte make in me, god, and trewe,
And right gaste in mi guttes newe.
12
Ne forwerpe me fra face of þe,
And þi hali gaste bere noght fra me.
13
Yhelde to me of þi hele fainnes,
And with heghist [gast] me fest þat es.
14
Þine waies wicked sal .I. kenne;
And quedes torne to þe sal þenne.
15
Lese me fra blodes, god, god of mi hele es,
And glade sal mi tunge þi rightwisnes.
16
Lauerd, þou salte open lippes mine,
And mi mouth sal schewe lof þine.
17
For if þou wald offrand had .I. broghte;
Sothlik til offrandes lustes þou noghte.
18
Offrand make þou on haste
To god þat ert droued gaste;
Hert forbroken and meked thoghte,
God, forsake saltou noghte.
19
Welli make, lauerd, and noght ille,
To Syon in þi gode wille,
And bigged be þai bright als bem
Þe walles of Iherusalem.
20
Þen saltou take with þi hand
Rightwise offrand in þe land,
Onelotes and offrandes on alle halues;
Þen sal þai set ouer weued þine kalues.
