XLVI.
[1]
Alle genge, plaies with hend til heuen,
Miries to god in gladful steuen:
2
For lauerd hegh, aghful to se,
King mikil ouer alle land es he.
3
He vndrelaid folke vntil vs,
And genge vndre our fete þus.
4
He ches til vs his heritage som dele,
Fairehed ofe Iacob whilk he loued wele.
5
Vpstegh god in mirthe and blisse,
Lauerd in steuen of beme þat isse.
6
Singes til oure god, singe yhe;
Singes til oure kinge, singe yhe!
7
For king of alle erthe god es strange;
Singes wiseli, wele and lange.
8
Rike sal god ouer genge þat is;
God sites on sete hali his.
9
Princes of folke þai samened þam
With þe god of Abraham:
For goddes stalworthe of erthe þat are,
Swith mikel vphouen þai ware.