I.
[1]
Seli biern þat noghte is gan
In þe rede ofe wicked man,
And in strete of sinfulle noght he stode,
Ne sat in setel ofe storme vngode;
2
Bot in lagh ofe lauerd his wille be ai,
And his lagh thinke he night and dai.
3
And al his liue swa sal ite be
Als it fares bi a tre
Þat stremes ofe watres set es nere,
Þat giues his fruite in time ofe yhere,
4
And lefe of him todreue ne sal;
Whate swa he does sal soundefulle al.
5
Noght swa wickedmen, noght swa;
Bot als duste þat winde þerthe tas fra.
6
And þarfore wike in dome noght rise,
Ne sinfulle in rede ofe rightwise.
7
For lauerd ofe rightwise wate þe wai,
And gate ofe wicked forworth sal ai.—
Blisse to þe fadre and to þe sone
And to þe haligaste wil with am wone,
Als first was, es, and ai sal be
In werlde ofe werldes, to þe thre.
