MY LORD A-HUNTING
Chorus
My lady's gown, there's gairs upon 't,
And gowden flowers sae rare upon 't;
But Jenny's jimps and jirkinet,
My lord thinks meikle mair upon 't!
I
My lord a-hunting he is gane,
But hounds or hawks wi' him are nane;
By Colin's cottage lies his game,
If Colin's Jenny be at hame.
II
My lady's white, my lady's red,
And kith and kin o' Cassillis' blude;
But her ten-pund lands o' tocher guid
Were a' the charms his lordship lo'ed.
III
Out o'er yon muir, out o'er yon moss,
Whare gor-cocks thro' the heather pass,
There wons auld Colin's bonie lass,
A lily in a wilderness.
IV
Sae sweetly move her genty limbs,
Like music notes o' lovers' hymns!
The diamond-dew in her een sae blue,
Where laughing love sae wanton swims!
V
My lady's dink, my lady's drest,
The flower and fancy o' the west;
But the lassie that a man lo'es best,
O, that's the lass to mak him blest!
Chorus
My lady's gown, there's gairs upon 't,
And gowden flowers sae rare upon 't;
But Jenny's jimps and jirkinet,
My lord thinks meikle mair upon 't!
