XLV.
[1]
God oure toflight and might þus,
Helper in drouinges þat mikel fand vs.
2
For-þi sal we noght drede when land let be,
And hilles ben borne in þe hert ofe þe se.
3
Þai dinned, and dreued ere watres of þa;
To-dreued ere hilles in [his] strenght swa.
4
Stith cominge of streme faine[s] goddes cite;
He halyhed his telde heghist es he.
5
God in mid, it sal be stired nathinge;
Helpe it sal god ereli in grikinge.
6
Todreued er genge, and helded rikes are:
He gaf his steuen, stired landes þare.
7
Lauerd of mightes with vs es he;
Oure fanger god of Iacob be.
8
Comes and sees werkes of lauerd hand,
Takeninges whilk he set ouer þe land.
9
Awaiberande—for to wende—
Fightes to þe landes ende;
Bowe sal he bris, and breke wapenes ma,
And scheldes brinne with fire als-swa.
10
“Bihaldes, and sees þat god am .I..
Be heghed in genge, be heghed in land sal .I.”.
11
Lauerd of might with vs es he;
Our fanger god of Iacob be.