XLIII.
[1]
God, with our eres herde we þus,
Our fadres schewden vntil vs,
2
Werke in þair daies þat þou wroghte,
And in daies alde þat nou ere noghte.
3
Þi hand geng tospred, and þou set þam;
Þou twinged folk and outdraf am.
4
Ne for in þaire swerde lande aght þai,
Ne þar arme beryhed þam ai;
5
Bot þi righthand, þin arme als-swa,
And lighting ofe þi face, for þou quemed in þa.
6
Þou ert he mi god and mi kinge,
Þat sendes to Iacob hailsinge.
7
In þe [we] sal blaw with horn our ilwiland,
And in þi name forhone in vs risand.
8
For noght in bowe hope sal .I. al,
Ne mi swerde noght sauue me sal:
9
For þou sauued vs fra vs twingand,
And þou tospilte vs hatand.
10
In god sal we be looued al dai,
And in þi name be schriuen in werld ai.
11
And nou, þou output vs and spilt vs swa,
And in our mightes, god, noght sal tou outga.
12
Þou torned vs hindward after our faan;
And þat hated vs, refte him on-an.
13
Þou gaf vs als schepe ofe mete þat ware,
And in genge tospred vs þare.
14
Þou salde þi folke with-out waringe,
And noght was mikelhede in þair manginge.
15
Þou set vs vpbraidinge ful wide
Til our neghburs vs biside,
Sneringe and heþinge ful lange
To þas þat ere in our vmgange.
16
Þou set vs in liknes in genge to se,
Stiringe of heued in folke to be.
17
Mi schame ogaine me es al dai,
And schenschipe of mi face ouerhild me ai:
18
Fra steuen of vpbraidand and forspekand,
Fra face of fa and filighand.
19
Alle þes come ouer vs; ne we forgat þe,
Ne wiclike in þi witeworde noght dide we,
20
And hindeward wited oure hert na dai;
And þou helded oure sties fra þi wai,
21
For þou meked vs in swepinge stede,
And ouerhiled vs þe schadw ofe dede.
22
Ife we forgete name of oure god we kend,
And til oþer god if we spred oure hend,
23
Noght-ne sekes god þese to se?—
For hidinges of herte knawes he.
24
For al dai dedelike er we for þe;
Als schepe of slaghter wend er we.
25
Ris; lauerd, whi slepes tou?
Ris, ne outschoue in ende nou.
26
Whi tornes þou þine anneleth, kinge?
Forgetes oure wrecchedhed and oure drouing?
27
For meked es in dust oure saule þus;
Swelihed es in erþe þe wambe of vs.
28
Ris, lauerd, helpe vs for-þi,
And bi vs for þi name hali.
