XXXIX.
[1]
Abidand lauerd abade .I.,
And he biheld to me for-þi.
2
And mine bedes herde he,
And als-swa þenne led he me
Fra þe slogh of wrecchednes
And fra fen ofe drege þat es;
3
And he set mi fote on stane,
And righted mi steppes onane.
4
And he insent in mi mouth newe sange,
Newe sang til oure god, and lange.
5
Fele men se and drede þai sal,
And hope in lauerd sal þai with-al.
6
Seli man of wham þat isse
Name of lauerd hope ai hisse,
And noght biheld he in fantomes als
And in wodenesses þat ere fals.
7
Mani thinges maked þou,
Lauerd mi god, þine wondres nou;
And with þine thoghtes, þat ere slike,
Nane es whilke es to þe like.
8
.I. schewed and spak wele mare,
And ouer tale felefalded þai are.
9
Offrand and onelote wald þou noght se;
Eres sothlike made þou to me.
10
Offrand for sinne noght asked þou;
Þanne saide .I.: loke, .I. come nou.
11
In heued of boke writen es of me
Þat .I. suld do þe wille of þe.
Mi god, swa .I. wald in querte,
And þi lagh in mid of mi herte.
12
.I. schewed þi rightwisnes
In þe kirke þat mikel es;
Lo, mi lippes noght forbide .I. sal,
Lauerd, þou it wist wele al.
13
Noght hid .I. þi rightwisnes in hert mine:
.I. saide þi sothnes and hele þine;
14
Noght hid .I. þi merci and þi sothnes
Fra þe rede þat mikel es.
15
Þou sothlike, lauerd, noght fer þou
Make þine rewyngs fra me nou;
Þi merci and þi sothnes ai
Me vmgaf þai, night and dai.
16
For vmgaf me iuels ma
Of whilk na tale es [of] þa;
Mi wickednesses me vmlapped negh;
And noght might .I. þat .I. segh;
17
Felefalded ouer hare of mi heued ere þai,
And mi hert forlete me ai.
18
Queme to þe, lauerd, þat þou outake me;
Lauerd, to helpe me bihald and se.
19
Schent and schoned samen be þai
Þat seke mi saule to bere it awai;
20
Þai torne hindward, and schoned þai be,
Þat wilen iuels vnto me.
21
Rathlike þaire schenschepe bere þa
Þat sais to me: “wa, wa!”
22
Glade and faine mote ouer þe
Alle þat þe sekand be;
And “mikled be lauerd” ai þai sai
Whilk loue þi hele, night and dai.
23
And thiggand and pouer am .I.;
Lauerd bisied es ofe me for-þi.
24
Mi helper and mi schelder ertou:
Mi god, ne late þou noght nou.
