XXX.
[1]
In þe, lauerd, hoped .I.: noght schent .I. be
In ai; in þi rightwisnes lese me.
2
Helde þi nere to me and liþe;
Þat þou outake me high þe swiþe.
3
In god forhiler be to me nou,
And hous ofe toflighte, þat me saufe þou.
4
For mi strenghte and mi toflighte ertou al,
And for þi name me lede and froþer þou sal.
5
Þou salt lede me fra þat snare whilk þai
Hid to me, for [mi] schilder artou ai.
6
In þi hend .I. gife mi gaste þat es;
Þou boght me, lauerd, god of sothnes.
7
Þou hated in ilka lande
Fantomes ouer tomehe[d] yemande;
8
Sothlike in lauerd hoped .I..
I sal glade and faine in þi mercy.
9
For þou biheld mi mekenes nou,
Mi saule fra nedinges sauued þou,
10
Ne þou me belouked in hend ofe fa;
In roume stede þou set mi fete to ga.
11
Lauerd, of me haue mercy,
For droued am .I. witerli;
To-dreued es in wreth for wa
Mine eghe, mi saule, mi wambe als-swa.
12
For in sorwe waned mi life,
And mi yheres in sighinges rife.
13
Vnfest in pouerte es mi might,
And mi banes ere droued dai and night.
14
Ouer al mi faas made am .I.
Vpbraidinge ful witerli,
To mi neghburs swiþe ma,
Radnes to mi kouth als-swa.
15
Þa þat sagh me euerilkane
Out fra me þai fled onane;
To forgetelnes for vnquerte
Am .I. giuen, als dede fra herte.
16
.I. am made als lome forlorne,
For þat .I. herd, me biforne,
Mikel snibbinge þam amange
Ofe fele dwelland in vmgange;
17
In þat whil þai samen come ogain me,
To take mi saule reded þai be.
18
I sothlike, bi night and dai,
In þe, lauerd, hoped ai;
I saide: “mi god ertou to kalle;
In þine handes mi lotes alle”.
19
Outtake me ofe hend ofe mi faa,
And at ere filyhand me fra þa.
20
Light þi face ouer þi hine,
And saufe me make for mercy þine.
Lauerd, fordone sal [i] noght be,
For þat .I. ai kalled þe.
21
Schame mot wike, and be led to helle;
Dombe be swikel lippes felle,
22
Þat spekes ogain rightwis wickenes,
In pride, and in outweringnes.
23
Hou mikel manihede ofe þi swetnes
Lauerd, þat þou hid to þe dredand es!
24
Þou fulmade hopand in þe
In sight of sones of men to be.
25
In hidel ofe þi face þou salt am hide
Fra fordrouinges ofe men biside,
26
Þou salt forhil am in þi telde stille
Fra ogaine-sagh ofe tunges ille.
27
Blissed lauerd, for he selkouthed to me
His mercy in warned cite.
28
And .I. saide, in outgange of thoght mine:
“I. am kast fra face ofe eghen þine”.
29
For-þi herd þou þe steuen ofe me,
Whiles þat .I. cried to þe.
30
Loues lauerd, al haleghs hisse,
For sothnes seke sal lauerd þat isse,
And roumlike sal he yhelde in land
To þas þat ere pride doand.
31
Dos manlike, and your hert strenghþed be,
Alle þat in lauerd hope yhe.
