XXVIII.
[1]
Bringes to lauerd, goddes sones þat be,
Sones of schepe to lauerd bringe yhe.
2
Bringes to lauerd worschep and blisse;
Bringes to lauerd blis to name hisse;
Biddes to lauerd inwardeli
In his porche þat es hali.
3
Steuen of lauerd, þat es balde,
Ouer watres þat ere kalde;
God of masthede þonnered he
Ouer watres fele þat be.
4
Steuen of lauerd in mighte it es;
Steuen ofe lauerd in mikelnes.
5
Steuen of brekand cedres onane,
And breke sal lauerd cedres ofe Libane;
6
And grinde þam als Yban kalues he mon:
And loued als vnicornes son.
7
Lauerdes steuen of bitwixfalland low of fire es;
Steuen of lauerd smitand wildernes,
And stire sal lauerd with his hand
Wildernes of Cades land.
8
Steuen of lauerd forgraiþand hertes ma,
And vnhil thickenesses sal he swa;
And in temple of him þat isse
Alle sal þai sai “blisse”.
9
Louerd stithstreme in mas to wone,
And site lauerd kinge in ai mone.
10
Lauerd mighte to his folke sal giue,
And blis his folke in pees to liue.