XXVI.
[1]
Lauerd mi lightinge es in lede,
And mi hele; wham .i. sal drede?
2
Lauerd forhiler of mi life;
For whate sal [i] quake, swerde or knife?
3
Whil neghes ouer me derand,
To ete mi flesche fote and hand,
4
Þat droues me mi faas þat are
Þai are vnfeste and felle sare.
5
Ife stand ogaines me kastelles ma,
Noght drede sal mi hert for þa;
6
Ife vprise ogaine me fighte,
In þat sal .i. hope in mighte.
7
Life ofe lauerd asked .i.,
Þat sal .i. seke inwardeli:
Þat [i] wone hous ofe lauerd ine
Alle þe daies ofe life mine,
8
Þat .i. se wille of lauerd swa,
And seke his kirke in forto ga.
9
For he hide me in his kirke in iuels dai,
He hiled me in hidel ofe his telde ai;
10
In stane heghed me on-ane,
And nou heghed mi heued ouer mi fane.
11
.I. vmyhode, and offrede in telde hisse
Offrand ofe berand steuen þat isse;
.I. sal singe bi night and daie,
And salme to lauerd sal .i. saie.
12
Here, lauerd, mi steuen, þat .i. crie to þe;
Hafe merci ofe me, and here me.
13
To þe mi hert saide: “þe soght face mine;
.I. sal seke, lauerd, to face þine”.
14
Ne turne þine anleth me fra;
Ne helde in wreth fra þi hine swa.
15
Mi helper be; ne me forlete,
Ne me forse, god mi hele swete.
16
For mi fader and mi moder me forsoke þai;
Lauerd sothlike vptoke me ai.
17
Lagh set to me, lauerd, in waieþine,
And right me in right stiyhe, for faes myne.
18
Ne hafe giuen me onhande
In saules ofe me drouande;
For in me raas wicked witnes,
And leghed to þam þair wickenes.
19
.I. leue godes of lauerd to se
In þe land ofe liuande be.
20
Abide lauerd, manlike do nou,
And strenþhed be þi hert, and lauerd vphald þou.
