XXIII.
[1]
Of lauerd es land, and fulhed his;
Erþeli werld, and alle þar-in is.
2
For ouer sees it grounded he,
And ouer stremes graiþed it to be.
3
“Wha sal stegh in hille of lauerd winli?
Or wha sal stand in his stede hali?”
4
Vnderand ofe hend bidene
And þate of his hert es clene,
In vnnait þat his saule noght nam,
Ne sware to his neghburgh in swikedam;
5
He sal fange of lauerd blissinge,
And mercy of god his helinge.
6
Þis es þe strend of him sekand,
Þe face of god Iacob laitand.
7
Oppenes your yates wide,
Yhe þat princes ere in pride;
And yates ofe ai, vphouen be yhe,
And king of blisse income sal he.
8
“Wha es he kinge of blisse?” Lauerd strange
And mightand, in fight lauerd mightand lange.
9
Oppenes your yates wide,
Yhe þat princes ere in pride;
And yates of ai, vphouen be yhe,
And kinge of blisse income sal he.
10
“Wha es he þe kinge of blisse þate isse?”
Lauerd of mightes es king of blisse.
