XIX.
[1]
Lauerd here þe in þi drouinge dai;
Name ofe [god] Iacob forhile þe ai.
2
He sende þe helpe fra halgh onon,
And he helpe þe fra Syon.
3
Of al þine offrand mined he be,
And þine offrand fat made be.
4
He gife to þe after þi herte,
And [al] þi rede he feste in querte.
5
Faine in þi hele sal we,
And in name of oure god mikled be.
6
Lauerd fil al þin askinges with blisse.
Nou knewe .I. þat saufe made lauerd criste hisse;
7
He sal here him fra his hali heuen;
In mightand, hele of his right hand euen.
8
[Þai in waines, þai in horses al;
And we in name of louerd our god sal kal.]
9
Þai ere bonden, and felle sare;
And we raas, and rightid are.
10
Lauerd, make saufe þe kinge to be;
And here vs in what dai we calle to þe.