XVIII.
[1]
Heuens telles goddis blisse;
Þe walken schewes handeswerkes hisse.
2
Dai to dai worde riftes right,
And wisedome schewes night to nighte.
3
Noght ere speches, ne saghes euen,
Of whilk noght es herd þair steuen.
4
In al land outyhode þair rorde,
And in endes of werld of þam þe worde.
5
In sun he set his telde to stand;
And he als bridegome ofe his boure comand,
6
He gladed als yhoten to renne his wai;
Fra heghest heuen his outcome ai,
7
And his ogaine-raas til hegh sete;
Nes whilke þat hides him fra his hete.
8
Lagh of lauerd vnwemmed esse,
Tornand saules in to blisse;
Witnes of lauerd es ai trewe,
Wisedome lenand to littel newe.
9
Rightwisenesses ofe lauerd right, hertes fainand;
Bode of lauerd light, eghen lightand.
10
Drede of lauerd hali es ite,
In werld ofe werld, and ful ofe wite;
Domes of lauerd soth er ai,
And rightwished in þar-selfe er þai.
11
Yornandlike ouer þe golde
And stane derworthi mikel holde;
And wele swetter to mannes wambe
Ouer honi and þe kambe.
12
And þi hine yhemes þam, ouer al thinge;
In þam yhemand, mikel foryheldinge.
13
Giltes wha vnderstandes nou?
Of mi helinges me clens tou;
And fra outen night and dai
Forbere vnto þi hine ai.
14
If myne lordeschepes noght be al,
Þan vnwemmed be .I. sal,
And .I. sal be clensed clene
Of gilte mikel, albidene.
15
And be mon, at queme sal þa,
Speches of mi mouth at ga,
And thinginge ofe hert mine
Euer-mar in sight þine.
16
Lauerd mi helper ai he isse,
And mi bier vn-to blisse.
