CXLVIII.
[1]
Heryhes lauerd, ofe heuen isse,
In heghtes heryhes him with blisse.
2
Loues him, alle his aungeles be;
Alle his mightes, him loue yhe.
3
Loues him, sunne and mone bi nighte,
Loues him, sternes alle and lighte.
4
Heryhes him, heuens ofe heuens þe same;
And watres vnder heuens ere, loues lauerdes name.
5
For he saide, and made þai are;
He sente, and þai schapen ware.
6
In ai, and in werld ofe werld, sete he þa;
He sete bode, and it sal noghte forbiga.
7
Heryhes lauerd, ofe erthe þate esse:
Draguns and alle depnesse;
8
Fire, snawe, haile isse,
Blaste ofe stormes, þat makes worde hisse;
9
Hilles, knolles alle men kalle;
Tries fruitefulle, and cedres alle;
10
Bestes, and alle erfes ma,
Neddres, fogheles feþered als-swa;
11
Kinges ofe erthe and alle folke liuand,
Princes and alle demers ofe land.
12
Yhungmen, als-swa maidenes clene,
Elder with yhunger, al bidene
Loues name ofe lauerd witerli,
13
For vphouen es his name, ofe aneli.
14
His schrifte ouer heuen and erthe with blisse;
And he vphoue horne ofe folke hisse.
Ympne to his haleghs, to sones ofe Irael,
To folke neghand to him wele.