CXLIV.
[1]
I sal vpheue þe, gode, mi kinge isse;
And in werld, and in werld ofe werld, þi name blisse.
2
Bi alle daies sal .i. blisse þe same,
And in werld and in werld ofe werld þi name.
3
Mikel lauerd, and loflike es he;
And ofe his mikelhede nan ende mai be.
4
Strende and strende þi werkes loofe sal,
And þi mighte forthschewe with-al.
5
Mikelhed ofe blisse ofe þi halines ai
Sal þai speke, and þi wondres telle sal þai.
6
And mighte ofe þine aghfulnesses sal þai sai,
And þi mikelhed telle al dai.
7
Minde ofe mighthed ofe þi softnesse
Sal þai rifte, and glad in þi rightwisenes.
8
Mercifulle and mildeherted in lande
Lauerd, and mikel milde-herted and tholande.
9
Soft lauerd to alle he isse,
And his rewþes ouer alle werkes hisse.
10
Schriuen alle þi werkes, lauerd, to þe be;
And þine haleghs blisse to þe.
11
Blisse ofe þi rike sai þai salle,
And þi mighte speke ouer-alle;
12
Þat þai make kouth to mensones þi might ilike,
And þe blisse ofe mikelhed ofe þi rike.
13
Þi rike, rike of alle werldes ende;
And þi lauerdschip in strende and strende.
14
Trewe lauerd in alle his wordes isse,
And hali in alle werkes hisse.
15
Lauerd raises alle þat doune falle,
And þe hurte he vprers alle.
16
Eghen ofe alle, lauerd, hope in þe wide,
And þou giues þar mete in time fultide:
17
Openes tou þi hand ouer alle thinge,
And filles ilka beste with blissinge.
18
Lauerd rightwise in alle his waies isse,
And hali in alle werkes hisse.
19
Negh lauerd to alle him kalland esse,
Til alle him kalland in sothnesse.
20
Wille ofe dredand him sal he do,
And here þar bisekinge, and saufe make þo.
21
Lauerd yhemes alle him louand,
And forlese sal he alle sinnand.
22
Heryinge ofe lauerd mi mouth speke sal,
And blisse sal alle flesche with-al
Vnto hali name es hisse,
In werld and in werlde of werlde þisse.
