CXLIII.
[1]
Blissed lauerd mi god, þat leres righte
Mi hende at cocle, mi fingres at fighte.
2
Mi merci and infleinge mine,
Mi helper and leser mine;
3
Mi forhiler, and in him hope .i. ai;
Þat vndres folke vnder me al dai.
4
Lauerd, whilke es man for þou inknew him?
Ore sone ofe man, for þou weneste him?
5
Man til ydelnesse like made isse;
Als schadow forthgane daies hisse.
6
Lauerd, helde heuens, douncome with-alle;
Negh hilles, and reke þai salle.
7
Leuen brightnesses, and skater salt þam;
Outsend þine arwes, and todreue salt am.
8
Outsend þi hande fra heght nou,
Outake and lese me þou
Fra watres mani, and fra hand
Ofe outen sones ofe other land:
9
Whas mouth spekes vnnaitnesse,
Þair righthand righthand ofe wickenesse.
10
God, new sang sal .i. singe to þe,
To þe sal .i. singe in ten-strenged sautre.
11
Þate giues hele to kinges, þat boght Dauid
Þi hine fra swerde lithre: outake me with,
12
And outake me fra þe hande
Ofe outen sones ofe other lande,
Mouth ofe wham spekes vnnaitnesse,
Þair righthand righthande ofe wickenesse.
13
Whas sones als new plantes bene
In þar yhouthe apon to sene;
14
Doghtres ofe þam samen-dighte,
Vmtiffed als licknes ofe kirke brighte.
15
Cleues ofe þa fulle ere yhite,
Bolkenand fra þat in to þite;
16
Þair schepe brodefulle, mightsomande
In þar outgange; þar noute fat in lande.
17
Noght es fallinge ofe stanewalle swa;
Ne forthgange; ne crie in waies ofe þa.
18
Seli folke to wham þese ere, saide þai;
Seli folke ofe wham lauerd gode es ai.
