CXLII.
[1]
Lauerd, here þe bede ofe me;
With þine eres þou bise
Mi bisekinge in þi sothnesse;
Here me in þi rightwisnesse.
2
And noghte inga in dome with þi hine,
For noght bes righted al liuand in sighte þine.
3
For filiyhed es mi saule þe faa,
Mi life in erthe he meked swa;
4
In mirkenesses he bilouked me,
Als þe dede ofe werld sal be,
And gremed mi gaste es in me smerte,
In me todreued es mi herte.
5
.I. mined ofe daies alde, bithoghte am .i.
In alle þi werkes witerli;
In makinges þat þou has wroghte
Ofe þine hende .i. wele bithoghte.
6
.I. tospred min hende at þe to be;
Mi saule als erthe waterlesse to þe.
7
Here me, lauerd, swifteli,
Mi gaste waned ful bisili:
8
Noght turne þou þi face fra me,
And to falland in flaske like sal .i. be.
9
Herde make to me areli þi merci,
For þat in þe hoped .i.;
10
Kouth make to me wai whilke ga .i. sal,
For to þe mi saule houe .i. al.
11
Outake me fra mi faas, lauerd, to þe flegh .i. nou;
Lere me to do þi wille, for mi gode ertou.
12
Þi gaste, þat esse sa gode at nede,
In righte land ite sal me lede;
And for þi name swa hali esse,
Qwiken me saltou, in þine euennesse.
13
Þou sal outlede fra drouinge saule mine,
And forlese mi faas in merci þine,
14
And þat droue mi saule al tine þou sal;
For .i. hine þine ai am al.
