CXXXIX.
[1]
Outake me, lauerd, fra iuel man;
Fra wike bieren outake me on-an.
2
Þat thoght wickenesses in hert ai,
Fightes set þai alle þe dai.
3
Þai scharped þair tunges als neddres, swa;
Attre ofe snakes vnder lippes ofe þa.
4
Fra hende ofe sinfulle, lauerd, yheme me,
Outake me fra men þat wicked be:
5
Þat thoghte mi steppes til vnderga;
Proude, snares to me hide þa,
6
And strenges in snare þai set to be,
Biside þe wai schame set þai to me.
7
.I. saide to lauerd: mi gode ertou;
Here steuen ofe mi bisekinge nou.
8
Lauerd, lauerd, ofe mi hele es mighte,
Þou schadowed ouer mi heued in dai ofe fighte.
9
Noght gife þou me, lauerd, fra mi yherninge
Vnto sinfulle, for nakin thinge;
Þai thoght ogaine me: ne forlete me,
Þat thurgh hap vphouen þai be.
10
Heued ofe vmgange ofe þam es alle,
Swinke ofe þar lippes ouerhile am salle.
11
Falle sal ouer þam in land
Koles þat ere hate brennand;
In fire sal tou thrawe þam swa;
Fra wrecchednesses noght vnderstand sal þa.
12
Man iltunged, ai spekand,
Noght righted sal be in land;
Vnrightwise man, at his endinge
Take sal him iuels in steruinge.
13
.I. knew þat lauerd dome sal do
Ofe helples, wreke ofe pouer als-so.
14
Bot rightwise to þi name schriue sal þai;
And righte eerde with þi likam ai.
