University of Virginia Library

As we find wrytine in þe cred,
gud cristine men mon trew of ned,
fra ded haf tane ws al awa,
we sal ryse one domys day
In þe sammyne flesch we haf now.
þis is þe treutht, þat we in trew,
& [þ]is of oure treutht is grond-wal,
þocht sume fulis be with-al,
þat wil trew nane bot þat þai
be verray prowe here ore se may.
bot sich treuth has na med
þat kyndly sckil profit of ned.
bot [be] oure treutht ma we treu be skil,
þat god ma do quhat-euir he wil,
as be a sampil I sal tel
of flesche-rysing hou befel,
þat mony wist be prowe of sycht,
for to conferme godis mycht,
in þe sewine sleparis as kid he
þat borne ware in ephese.

as haly wryt recordis ws,
ane emperoure, callit decius,
þat michty was of landis sere
& regnyt th[r]e moneth & a ȝere,
fra crist tuk flesche of oure lady
twa hundir ȝere thre & fyfty;
to cristine men he was fel fa,
& but pyte gert þame sla,
quhare-sa mycht þai fundyne be.
sa hapnyt a tyme þat he
come to þe towne of ephysy,
quhare he gert byg ful richely
In þe mydis of þe cite
a tempil, rycht fare to se.
at his dewyse quhene It was mad,
he bad his badalis ga but bad,
& gere þe puple of þe towne
one þe morne be redy bowne,
& come ilkane in þare degre
to sacryfy lyk as he,
his mawmentis til emples,
thru quham he had honoure & es,
as he trewyt be mysknawine,
þat let hyme wyt na suthtfast thing.
& one þe morne but delay,
rycht as he bad, sa did þay
& gert men cum mony wyse,
til ydolis to do sacryfice.
& cristine men þat come nocht þare,
straytly gert he punyse but mare,
þame manesand ded in þat place
but respyt ore ony grace.
In sik dout ware þe cristine men,
þat in þai landis ware þene,
þat na frend durst vthyre knaw,
na þe fadir þe sowne, fore aw
or dout It ware one þam tald
cristis fereme treutht þat þai hald.