CXXXV.
[1]
Schriues to lauerd, for gode he isse,
For in werld es merci hisse.
2
To god ofe goddes schriues nou:
3
To lauerd ofe lauerdes schriues yhou:
4
Þat makes aneli grete wondre thinge:
5
Þat made heuens in vndrestandinge:
6
Þat festened land ouer watres to be:
7
Þat grete lightnesses maked he:
8
Þe sunne in mighte ofe daies lighte:
9
Þe mone and sternes in might of nighte.
10
Þat smate Egipte with firstgeten ofe þa:
11
Þat lede Irael fra mide ofe þa,
12
In hand mightand þat was slegh
And arme als-swa wondre hegh.
13
Þat delte þe rede see in delinges wele,
14
And lede thurgh mide it Irael;
15
And Pharao als-swa smate he
And his might in þe rede se.
16
Þat led his folke thurgh wildernesse:
17
Þat smate kinges mare and lesse;
18
And he slogh kinges stalworth ware:
19
Seon kinge ofe Amorri þare;
20
Oge kinge of Basan als-swa;
21
And eritage gafe þe land ofe þa:
22
Heritage to his [hine] ofe Irael.
23
Þat in our mekenes mind ofe vs wel;
24
And he boght vs with his wille
Fra our faas þate wald vs ille.
25
Þat giues mete til al flesche þat isse.
26
Schriues to god ofe heuen blisse:
27
Schriues to lauerd night and dai,
For his merci es in ai.
