XI.
[1]
Sauf me, lauerd, for halgh nouþer wones,
For lessed ere sothenes fra mennes sones.
2
Idelnesses spake þai thurgh þair breste
Ilkan to his neghburgh neste;
With lippes swikel swith smerte
Spake þai in hert and herte.
3
Lauerd lesses alle lippes swikel,
And þe tunge þat spekes mikel,
4
Þat saide: “oure tunge mikel we;
Oure lippes ofe vs are; wha oure god mai be?”
5
“For wrecchedhede helples, and pouer sighinge,
Nou sal .I. rise”, saide lauerd kinge,
6
“.I. sal sete in hele ilka lim;
Ful treweli sal .I. make in him”.
7
Speche ofe lauerd, speche clene and schire;
Siluer fraisted with þe fire,
Fanded of erþe, als it es talde,
Againe clensed seuenfalde.
8
Þou, lauerd, sal loke vs night and dai,
And yeme vs fra þat strende in ai.
9
In vmgang wicked ga sal nou;
After þi heghnes mensones felefaldes tou.