University of Virginia Library

thane, þare gret sorow til ames,
petyre þame tald how It was
hapnyt til hyme, & þe cause quhy.
þane tuk þai confort al in hy.
In antyoch, ore þis befel,
þis symon magus cane dwel,
& al þai folkis dyssawyt Il
with þe fals layre he taucht þam til;
fore þai ful wele wend bedene
at a prophet he had bene;
& ay he lakyt in al thing
sancte petyre & his sermonyng,
sayand he was ane enchantore,
a wech and a trigetouyre;
& sa forsuth has hyme defamyt,
& his name to þe puple blamyt,
þat þai wald ryf hyme with þar tetht;
fore to gere folk ere, it is ful eth.
fore-þi to faustyniane
petyre one hand syk spech has tane:
“for-þi þat þu art sa lyk now
to symon magus, I wil þat þu
til antyoch pas in hy,
& excuse me þare opynly
of It, þat symone sad one me,
fore þai sal wene wele þou art he,
& prech þe contrare opynly
of It he sad falsly;
& say þat þu has falsly leyt
In al, quhare-of þu me [has] wreyt;
& say to þame, þat, gyf euirmare
of me þou prech þe contrare,
þat þai in þe trew neuir fra þane,
bot hald þe as a wikyt mane.
& in þis vyise quhen þu has done,
til antyoch I sal cume sowne,
& þat fals fygure fra þe tak,
& in þi state I sal þe mak.”
faustyniane passyt one sone
&, as petyre bad, has done;
& in þe mydis of þe towne
þis be-gane he to sermone:
“I grant til almen þat here, þat I,
symon, has leyt, wykytly,
[þat] callyt petyre trigetoure,
dissawoure fals, ore enchanture;
bot he fore al saul-heyle is send,
rychtwis treutht til amend.
þare-fore playnly I consale ȝow,
þat in hyme al hale ȝe trew;
& gif ȝe ne do, trewis at ȝe
& ȝoure towne confundit sal be.
& gif It hapnys euirmare
þat I cume aganis þis lare,
I mones ȝow ȝe trew nocht me,
bot hye gere hang me one a tre.”
þane throw þis sermon þat he mad,
gret luf to petyre þe folk had,
þat gret desowle to hym had done
before. with þat come petyre sone,
& fore faustyniane cane pray,
& his dyffourmyng put away.
þane al þe folk of þat cite
of petyreis come ful glad can be,
& with ful gret honoure hyme met,
& als in byschapis set hym sat,
& askit pardone of þe syne,
þat before þai did hyme In.
& al þat euire ware sek ore sare,
til hyme ware brocht in þat sythtware;
& be his prayere gret & smal
of þare seknes ware waryst al.
þane be his lare in dais tene
of weman, barnis, & of mene
twelf thousand wane he þar & mare,
to godis baptysme gert þam care.

thane, quhene þis [symon] magus herd
how with sancte petir þe puple ferd,
ydyr he come, & sad þame al:
“I haf ferly quhow þis ma fal,
þat ȝe haf lewyt hale myn lare
quhare-in ȝe sa parfyt ware,
& now resawis vith honoure
petir, þat fals trygetoure,
& namely sene I fore-bad ȝou,
til hyme, ore to his lare to trew.”
þane answert al þat þare was,
& sad til hyme in gret wodnes:
“þu art a wondir bysnyng beste
til ws al, mast and leste,
for thre dais passit are nocht
sene þu sad [þat] þe forthocht
a-gane hyme þat þu had done,
& now perwert ws wald sa sone,
& as þu presis þe with-al
fra oure saule-heile to gere ws fal!”
with þat al schot sone one hyme,
þat was þare, mare & myne,
& huntyt hym owt of þare towne
with slandyre & confusione;
& [sa] þe traytoure, I of tel,
In-to þe gyrne he mad, syne fel.