X.
[1]
In lauerd traist .I.; hou sai ye
Of mi saule hou sal it be:
.I. sal forthfare, ife .I. wil,
Als a sparwe in to þe hil?
2
For loke, sinful þair bowe þai bent,
Þair arwes in a quiuer sente,
Þat þai schot—to make vnquerte—
In mirkenes rightwise ofe herte.
3
For whilke made þou fordide þai;
Ryghtwise sothlike what dide he ai?
4
Lauerd in kirke hali hisse;
Lauerd in heuen his sete it isse.
5
His eghen lokes whare pouer wones,
His brwes askes mennes sones.
6
Lauerd askes rightwise and wike to se;
And þat loues quednes his saule hates he.
7
Raine sal it ouer sinnand
Snares; fire, brimstan brinnand,
Blaste ofe stormes stiþe and strange,
Sum sal be þar drinke amange.
8
For right lauerd, and loues rightwisenes;
His likam ses euennes.