LXXXVII.
[1]
Lauerd, god of mi hele, in dai cried .i.
And bi nighte bifore þe, sothli.
2
Inga in þi sight bede mine,
Vnto mi praier helde ere þine.
3
For fulfilled es mi saule of wa,
Mi life neghed to helle als-swa.
4
.I. am wened in ilka land
To þas þat ere in flosche falland,
Made am .i. als man to se
Withouten help, bitwix dede fre;
5
Als wounded, slepand þat are
In throghes, of wham mined [þou] es namare,
And þai oute ofe þi hand for ai
Ere outschouued nighte and dai.
6
Þai set me in slogh inrest esse,
In schadow of dede, and in mirkenesse.
7
Ouer me es þi wreth stedde,
And al þi stremes ouer me þou inledde.
8
Fer made þou mi kouth fra me,
Þai set me wlatinge to þam to be.
9
.I. am giuen, and .i. noght outyhed;
Mine eghen heuid for mi wrecchedhed.
10
Lauerd, to þe al dai .i. cried,
Mine hend to þe .i. outspred.
11
Wher wondres to dede saltou do?
Ore leches sal rere, and schrine þe to?
12
Wher ani in thrughes sal telle pi milthnes,
Ore in tinsel þi sothnes?
13
Wher knawen sal be þi wondres in mirkenes,
Ore þi rightwisenes in land ofe forgetelnes?
14
And to þe, lauerd, cried .i.,
And mi bede bifore-come þe arli.
15
Wharto, lauerd, awaiputtes þou bede mine,
Fra me þou turnes face þine?
16
I am poure, fra mi yhouth in swinke and wa;
I am vplifted, .i. am meked, todroued swa.
17
In me forthferd wrethes ofe þe,
And þi radneses todreued me.
18
Þai vmgafe me als watre al dai,
Þai vmgafe me samen ai.
19
Neghbu[r]gh and frend fered þou fra me,
And mi kouthe, fra wrecchedhed to be.
