University of Virginia Library

[Scene II]

Heaven.
Jesus.
Myne aungellis louely of late, lighter þan þe levene,
In-to þe erþe wightly I will þat ȝe wende,
And bringe me my modir to þe highest of heuene,
With mirthe and with melody hir mode for to mende.
For here schall hir blisse neuer be blynnande,
My modir schall myldely be me
Sitte nexte þe high Trinite,
And neuere in two to be twynnand.

i Ang.
Lorde! atte þi bidding full bayne will I be,
Þat floure þat neuere was fadid full fayne will we fette.

ii Ang.
And atte þi will, gode lorde, wirke will we
With solace in ilke side þat semely vmsitte.

iii Ang.
Latte vs fonde to hir faste fors hir to deffende,
Þat birde for to bringe vnto þis blis bright,
Body and sawle we schall hir assende,
To regne in þis regally, be regentte full right.

iv Ang.
To bliss þat birde for to bringe,
Nowe Gabriell, late vs wightly be wendand;
This maiden mirthe to be mendand,
A semely song latte vs sing.

Cum vno diabolo.
Et cantant antiphona scilicet Aue regina celorum.