 | The songs and poems of Robert Tannahill |  |
4
THOU BONNIE WOOD O' CRAIGIELEE.
Thou bonnie wood o' Craigielee,
Thou bonnie wood o' Craigielee,
Near thee I pass'd life's early day,
And won my Mary's heart in thee.
Thou bonnie wood o' Craigielee,
Near thee I pass'd life's early day,
And won my Mary's heart in thee.
The brume, the brier, the birken bush,
Bloom bonnie o'er thy flowery lee,
An' a' the sweets that ane can wish
Frae Nature's hand, are strewed on thee.
Bloom bonnie o'er thy flowery lee,
An' a' the sweets that ane can wish
Frae Nature's hand, are strewed on thee.
Thou bonnie wood, etc.
Far ben thy dark green plantin's shade,
The cushat croodles am'rously,
The mavis, doon thy buchted glade,
Gars echo ring frae ev'ry tree.
The cushat croodles am'rously,
The mavis, doon thy buchted glade,
Gars echo ring frae ev'ry tree.
Thou bonnie wood, etc.
Awa', ye thochtless, murd'rin' gang,
Wha tear the nestlin's ere they flee!
They 'll sing you yet a cantie sang,
Then, oh! in pity let them be!
Wha tear the nestlin's ere they flee!
They 'll sing you yet a cantie sang,
Then, oh! in pity let them be!
Thou bonnie wood, etc.
When winter blaws in sleety showers,
Frae aff the Norlan' hills sae hie,
He lichtly skiffs thy bonnie bowers,
As laith to harm a flower in thee.
Frae aff the Norlan' hills sae hie,
He lichtly skiffs thy bonnie bowers,
As laith to harm a flower in thee.
Thou bonnie wood, etc.
Though fate should drag me south the line,
Or o'er the wide Atlantic sea,
The happy hours I 'll ever mind
That I, in youth, ha'e spent in thee.
Or o'er the wide Atlantic sea,
The happy hours I 'll ever mind
That I, in youth, ha'e spent in thee.
Thou bonnie wood, etc.
| The songs and poems of Robert Tannahill | |