University of Virginia Library

previous section The Scottish Works of Alexander Ross
next section
164

WOO'D AND MARRIED AND A'.

[_]

The attribution of this poem is questionable.

1

The bride came out of the byre,
And O as she dighted her cheeks!
Sirs, I'm to be married the night,
And has neither blankets, nor sheets,
Has neither blankets, nor sheets,
Nor scarce a coverlet too.
The bride that has a'thing to borrow,
Has e'en right meikle ado.
Woo'd and married and a',
Woo'd and married and a',
And was nae she very weel aff,
That was woo'd and married and a'?

2

Out spake the bride's father,
As he came in frae the plough,
O had ye're tongue, my doughter,
And ye's get gear enough;
The stirk that stands i'th' tether,
And our bra' basin'd yade
Will carry ye hame your corn;
What wad ye be at, ye jade?
Woo'd and married, &c.

3

Out spake the bride's mither,
What d---l needs a' this pride!
I had nae a plack in my pooch
That night I was a bride;
My gown was linsy-woolsy,
And ne'er a sark ava;
And ye hae ribbons and buskins,
Mae than ane or twa.
Woo'd and married, &c.
165

4

What's the matter? quo' Willie,
Tho' we be scant o' claiths,
We'll creep the nearer the gither,
And we'll smore a' the fleas:
Simmer is coming on,
And we'll get teats of woo;
And we'll get a lass o' our ain,
And she'll spin claiths anew.
Woo'd and married, &c.

5

Out spake the bride's brither,
As he came in wi' the kie,
Poor Willie had ne'er a tane ye,
Had he kent ye as well as I;
For you're baith proud and saucy,
And nae for a poor man's wife;
Gin I canna get a better,
Ile never tak ane i' my life.
Woo'd and married, &c.

6

Out spake the bride's sister,
As she came in frae the byre,
O gin I were but married!
It's a' that I desire:
But we poor folk maun live single,
And do the best we can;
I dinna care what I shou'd want,
If I cou'd get but a man.
Woo'd and married, &c.
previous section The Scottish Works of Alexander Ross
next section