University of Virginia Library

IV. In illo tempore Recumbentibus.

In þat time and in þat lande
Ellefe disciples wore sitand,
And Iesus to þam shewed he,
þat louerd is and ai sal be,
And vpbraided mistrouht of þo
And hardnes of hert als so,
ffor to þo þat segh him rise
Walde þai noht liue on no kin wise.
And to þam he saide on hand:
“In alle þe werlde yhe be goand,
And þe ewangel spelle yhe
Til alkyn creature mai be.
And þat trowes and cristend isse,
Sal be sauf til heuen blisse,
And þat leues noght for thi,
Sal be fordone witerli.
þhese tokenes þat liuen right,
Sal filihe þam bi dai and niht.
In the name min deuelnesse
Sal þai out kest fro more and lesse;
With new tunges speke sal þai,
Neddres sal þai do a-wai;
And if dedlic dronken haue þai oght,
To þam dere sal it noht;
Apon seke lai sal þai hende,
And wel sal þo haue and amende!”
When þat soghlic louerd Iesus
Hade spoken in til am þus,
Vptan he is in heuen briht
And sites on godes halue riht.
þai sothelic forth yhode spelland
Ouer alle in ilka land,
God wirkand and sagh festenand
With tokenes þat wore filihand.