Binorie, O an Binorie
THE TWA SISTERS—M
[_]
Taken down from recitation at Old Deir, 1876, by Mrs
A. F. Murison. MS., p. 79.
1
There lived twa sisters in yonder ha,
Binórie O an Binórie
They hadna but ae lad atween them twa,
He's the bonnie miller lad o Binórie.
2
It fell oot upon a day,
The auldest ane to the youngest did say,
At the bonnie mill-dams o Binórie,
3
‘O sister, O sister, will ye go to the dams,
To hear the blackbird thrashin oer his songs?
At the,’ etc.
4
‘O sister, O sister, will ye go to the dams,
To see oor father's fish-boats come safe to dry lan?
An the bonnie miller lad o Binorie.’
5
They hadna been an oor at the dams,
Till they heard the blackbird thrashin oer his tune,
At the, etc.
6
They hadna been an oor at the dams
Till they saw their father's fish-boats come safe to dry lan,
Bat they sawna the bonnie miller laddie.
7
They stood baith up upon a stane,
An the eldest ane dang the youngest in,
I the, etc.
8
She swam up, an she swam doon,
An she swam back to her sister again,
I the, etc.
9
‘O sister, O sister, len me your han,
An yes be heir to my true love,
He's the bonnie miller lad o Binorie.’
10
‘It was not for that love at I dang you in,
But ye was fair and I was din,
And yes droon i the dams o Binorie.’
11
The miller's daughter she cam oot,
For water to wash her father's hans,
Frae the, etc.
12
‘O father, O father, ye will fish your dams,
An ye'll get a white fish or a swan,
I the,’ etc.
13
They fished up and they fished doon,
But they got nothing but a droonet woman,
I the, etc.
14
Some o them kent by her skin sae fair,
But weel kent he by her bonnie yallow hair
She's the bonnie miller's lass o Binorie.
15
Some o them kent by her goons o silk,
But weel kent he by her middle sae jimp,
She's the bonnie miller's lass o Binorie.
16
Mony ane was at her oot-takin,
But mony ane mair at her green grave makin,
At the bonny mill-dams o Binorie.
