THE WEE WEE MAN—B
[_]
Caw's Poetical Museum, p. 348.
1
As I was walking by my lane,
Atween a water and a wa,
There sune I spied a wee wee man,
He was the least that eir I saw.
2
His legs were scant a shathmont's length,
And sma and limber was his thie;
Atween his shoulders was ae span,
About his middle war but three.
3
He has tane up a meikle stane,
And flang't as far as I cold see;
Ein thouch I had been Wallace wicht,
I dought na lift it to my knie.
4
‘O wee wee man, but ye be strang!
Tell me whar may thy dwelling be?
‘I dwell beneth that bonnie bouir;
O will ye gae wi me and see?’
5
On we lap, and awa we rade,
Till we cam to a bonny green;
We lichted syne to bait our steid,
And out there cam a lady sheen.
6
Wi four and twentie at her back,
A' comely cled in glistering green;
Thouch there the King of Scots had stude,
The warst micht weil hae been his queen.
7
On syne we past wi wondering cheir,
Till we cam to a bonny ha;
The roof was o the beaten gowd,
The flure was o the crystal a'.
8
When we cam there, wi wee wee knichts
War ladies dancing, jimp and sma,
But in the twinkling of an eie,
Baith green and ha war clein awa.
