60. STELLA CELI EXTIRPAUIT (II).
[_]
[MS. Rawl. c. 48, leaves 133, back, to 134.]
1
O blissid queen, a-bove the sterrid heuene,
Which of the see, art callid cheef lodsterre,
Thi dwellynge is a-bove the sterris sevene,
Where euer is Ioye, and pes withoute werre,
Cast down on vs, thi look that art so ferre
From all myscheef, be thou oure cheef deffennce,
In oure moost trouble thi socoure latt be nerre
And be oure sheeld from strok of pestilence.
2
In paradys withe Ioye and al plesaunce
Adam was put, talyvid withouten eende,
But thoruh his synne fil hym a grete myschaunce
Brouht in first dethe thoruh temptynge of ye feende,
But thou lady that art so good and keende
Sicut Adam
primo interduxit mortem Sic maria primo interduxit vitam.
To the be pryes, with Ioye and reverence.
Thou brouhtist lyve, to me and all man-kynde,
And puttist away eternal pestilence.
3
Thou glorious sterre this world to enlumyne,
Thi name to preise I haue no suffisaunce,
On vs synneres thi mercy lat doun shyne,
Off infect heires oppresse al there vttraunce,
Vs to infect that thei haue no puissaunce;
From theire batail be thou oure cheef deffennce,
That theire malis to vs do no grevaunce,
Off infectynge or strok of pestilence.
4
Thou splendaunt sterre, of sterris moost souereyne,
Graunt me thes thre, moost excellent princesse,
The first is this, I pray the nat disdeyne,
To haue lengthe of lif nat medlid with seeknesse,
Off wordly goodis graunt me also largesse,
Withouten striff, to Goddis reverence,
The thrid is that my soule, withouten distresse,
May come to the blisse where drad is no pestilence.
Explicit. per I. pro. [sic.]
