University of Virginia Library

Þanne wist þemperour wel þat þei were treuwe,
& made þe messagers þe murrþe þat he couþe,
realiere nere neuer rinkes resseiued in place.
Manli made þemperour his messageres out-wende,
alle þe lordes of þat lond lelli to somounne
to be redili a-raied in here richest wise,
to wend with him wiȝtli to þe wedding nobul.
& wan þei herden his hest þei hieȝeden fast,
& certes on þe selue day þat hem was a-signed,
so riche a route in rome was rialiche a-sembled,
þat neuer seg vnder sunne ne saw swiche a-noþer,
so triȝliche a-tired of al þat to hem longed;
& went wiȝtli here [way] wen þei were ȝare,
& alisaundrine with hem as i arst munged.
& wending as þei were in here way þat time,
of þe menskful messageres þemperour þanne asked,
bi what cas his douȝter was fare to þat londe,
& how kendeli sche was knowe þat king wold hire wedde.
& þei titli him told al þe trewe soþe,
of alle fortune þat was falle fram comsing to þende,
In alle maner as i munged in mater here bi-fore.
& whanne þemperour hade herd how [þat] hit ferde,
he was gretteli gladed and oft crist þonked
of þe fortune bi-falle of so faire an hende,
& munged þanne al þe mater to his meyne sone,
as þo menskful messagers hade munged be-fore.
þe murþe þat þanne was maked miȝt no tonge telle,
þat tit was mad for þo tiding whan þei told were.
& so þan held þei here way harde & faste,
til þei to palerne prestili with al þat pres come.