The Metrical Chronicle of Robert of Gloucester :: :: University of Virginia Library

The Metrical Chronicle of Robert of Gloucester

Edited by William Aldis Wright

(fl. 1260-1300)

Collapse All | Expand All expand section

Descripcio Anglie.

Þe kyng of þe march þulke time hadde wel þe beste
Muchedel of engelond þe on half al bi weste
Wircestressire & warewik & also of gloucestre
Þat neiȝ is al o bissopriche þe bissopes of wrcestre
He hadde ek þer to chestre ssire & derbi ssire al so
& stafford ssire þat beþ alle in o bissopriche ido
Þe bissopriche of chastre & ȝut he hadde þer to
Scropssire som & aluendel of warewik ssire al so

Þis king hadde ek herefordssire þat o bissopriche is
Ac ssropssire ȝeldþ haluendel to þulke bissopriche iwis
& som of gloucestressire & of warewikssire al so

Ȝut hadde þe kyng of þe march wel more lond þer to
Norhamtessire & bokingham & þe ssire of oxenford
Leicestre ssire & lincolne & þe ssire of hertford
Þat is al o bissopriche þat of lincolne is
Þat ȝwile was at dercestre biside oxenford iwis

Ȝvt hadde þe king of þe march notingham ssire þer to
In þe bissopriche of everwik ac þo nas hit noȝt so
& al walis ȝvt þer to þat a gret lond is
Al þis was ȝwile icluped þe march of walis
Vor þe lond bitvene homber & þe water of temese iwis
Ich wene in þe bissopriche of lincolne hit is

And þe bissopriche of lincolne & bi weste al þat lond
Þe king wule of þe march adde al in his hond
Þe king of westsex adde þo al wiltessire iwis
& dorsete & barcssire þat a bissopriche his
Þe bissoprich of salesburi & al souþsex þer to
Þe welde & al þe bissopriche of chichestre al so
& souþhamtessire & souþereye þat on bissopriche is
Þe bissopriche of winchestre þat ȝvt is þere iwis