University of Virginia Library

Of the synne of wrathe.

Wrathe than is the fourth synne
And grete Ieoperdy to slepe therin.
Haste thou ony tyme in thy desyre
In thy malyce and in thy yre.
That at thy pleasure/and for thy sake.
Uengeaunce vpon man or beest sholde be take.
Hast thou in thy malyce yre and werke
Layde vyolent hande on preest or clerke
Or on thy neyghboure/in cyte or shyre
Otherwyse then good ordre wyll requyre.
On wyfe chylde or seruaunte.
Beynge with the in seruyce or conaunte
So sore peraduenture thou dydest them streke.
That synewe or bone thou dedest breke
Or so sore hathe ben theyr correccyon.
That terme of theyr lyues hath thought the on.
If thou haue done so do not blynne
Shryue the sone for it is synne
Haste thou in wrath made ony debate
Amonges neyghbours or estate
Shewe me sone and do not skof
And what inconuenyence cometh therof
Haste thou in malyce ony tyme or ofte.
Thy ghoostly fader set at noughte
And hym rebuked in house or bordres
Or ony other within holy ordres.
Hast thou ben dysobedyent vnto father or mother
Unto thy father in aege or suche other
And whan they haue the good taughte
In thy malyce sette them at naughte
This is the Iuste and veramente
Agaynst the fourthe commaundemente
Thou sholdest not sone in no wyse.
Stere them to wrathe nor yet to malyce
But them to worshyppe and honoure
To them knele and also coure.
And them to soccure in tyme of nede
With golde and syluer with fode and wede
And thē not to begyle of goodes nor landes
Nor to laye on them vyolent handes
Doynge thus this is thy mede
Thou arte accursed in very dede
And canst not be assoyled Iust and sure

Ihesu.

But of hym that hath the bysshops powre.
Doste thou in thy malyce or in thy fume
The goodes of god them consume
In sekynge counsayle of men of lawe
When thy matter is not worth a strawe
But as who sayth I wyll do this.
I tell the sone thou dost amys
Thou sholdest forgyue in thy herte fre
All those that dothe offende the.
Haste thou troubled ony prest or clerke
That were busy in good werke
Cryst hymselfe calleth this house.
The chyrche truely his owne spouse
The whiche is made for nought elles
But for prayer as the boke telles
There thou sholdest gete thyne ynne
To praye and wepe for thy synne
Haste thou for malyce or ony tyme besyde
Used wytchcrafte by ony tyde
He that byleueth in the faye
Must leue it by ye and naye
For it is a mynde of the deuyll
Causynge the people to do euyll.
And suche byleue maketh them haue
ye that wytchcrafte shall them saue
So with charmes and with tell
They be brought agayne to hell.
Thus with the deuyll they be blynde.
And in theyr fayth ferre behynde
Haste thou vsed by wrathe or meuynge
Ony grete othes or blasphemynge
To swere or curse dost thou not care.
I rede the sone of this beware
Where swerynge is vsed without drede
Uēgeaūce is there hāgyng as heuy as lede
And but thou amende thy lyfe ere.
It wyll fell on thyselfe or thy louere.
Hast yu in thy malyce hurte thy neyghbour
Of his good name fame or honoure.
His good or catayll by waye or strete
Or in ony other place thou dydest it mete
Hast thou ony tyme put or begon.
Wrōgfully thy neyghbour to his purgacyō
Thou art to blame suche werkes to werche
And accursed by holy chyrche
Hast thou taken from hym his good fame
Or called hym by ony nycke name
As traytoure thefe or ony other syche.
Shryue the sone I am a lyche
I am here sone in goddes stede.
I maye helpe the do not drede,
And as truely as euer mā dranke in dysshe
I wyll make the hole as ony fysshe
Somtyme though thou be wrath yu dost not offede
If thou do thy neyghboure to amende.
Of his vnthryfty and synfull lyfe.
With his neyghbours many other with his wyfe.
Irascimini et nolite precare so saythe the verse
And it be for yt cause or suche other as I dyd reherse
Of this synne nowe I speke no more.
Euery man knoweth his owne sore.