Die Gedichte des Franziskaners Jakob Ryman | ||
291
CXV. A meyden mylde hath born a chylde
Mankynde a-yene to by:
Hys name Ihesus ys callyd thus
And here name mylde Mary.
1
O man of molde, mekely beholde,Hou god mankynd hath take,
As prophetis told many a folde,
Of a meyde for thy sake.
2
An angelle bright came downe with lightTrue tydyngys forto telle.
He seyde fulle right: ‘The kyng of myght
In the, truly, wylle dwelle.’
3
Alsoo he seide vnto thatte meyde:‘Thou shalte conceyue a chylde,
And thou shalt be, as I telle the,
A meyden vndefylde.’
4
Of this thatt meyde was sore a-freyde,Butte yett she dydde inclyne,
And so fulle sone this dede was done
By goddys grace dyuyne.
5
‘Behold,’ she seyde, ‘goddys handmeyde:Thy worde be done in me;’
And a-non ryght by goddys myght
That tyme with chyld was she.
6
The holigost of myghtys mostDid make thatte meyde in dede
To conceyue than bothe god and man
Wythowten mannys sede.
7
Bothe day and howre lete us honowreMary, thatte meyden mylde,
Thatt nowe to us hath born Ihesus,
And she neuere defylde.
Die Gedichte des Franziskaners Jakob Ryman | ||