Poems, on sacred and other subjects and songs, humorous and sentimental: By the late William Watt. Third edition of the songs only--with additional songs |
Poems, on sacred and other subjects | ||
108
GREEN BUD THE BIRKS AGAIN.
Green bud the birks again,
Green bud the birks again,
The primrose springs, the mavis sings,
And Robin vows he'll be my ain.
Green bud the birks again,
The primrose springs, the mavis sings,
And Robin vows he'll be my ain.
Wi' him I've ranged the birken shaw,
Wi' him I've wander'd by the burn;
I sigh'd when Robin was awa,
But sang wi' joy at his return.
Wi' him I've wander'd by the burn;
I sigh'd when Robin was awa,
But sang wi' joy at his return.
The swallow skims, on wing fu' fleet,
Athwart the summer-evenin' sky,
Sae swift, wi' Robin, and sae sweet,
The langest nichts hae glided by.
Athwart the summer-evenin' sky,
Sae swift, wi' Robin, and sae sweet,
The langest nichts hae glided by.
There's nane like him can sing and dance,
There's nane like him sae leal, I trow,
There's nane like him, wi' winnin' glance,
Sae finely kens the way to woo.
There's nane like him sae leal, I trow,
There's nane like him, wi' winnin' glance,
Sae finely kens the way to woo.
O' him I think the leelang day,
O' him I dream the leelang nicht,
Wi' him in fancy still I stray;
Sae time flees by unheeded licht.
O' him I dream the leelang nicht,
Wi' him in fancy still I stray;
Sae time flees by unheeded licht.
My faither fain would ha'e me tied
To some daft gomrel landed laird;
But I'll be nane but Robin's bride,
For he is a' my heart's regard.
To some daft gomrel landed laird;
But I'll be nane but Robin's bride,
For he is a' my heart's regard.
Poems, on sacred and other subjects | ||