University of Virginia Library

[Scene II,

Near Mary's grave.]
iv Angelus.
Hayle! þe doughtir of blissid Anne,
Þe whiche consayued thurgh þe holy goste,
And þou brought forthe both god and manne,
The whiche felled doune þe fendis boste.

v Angelus.
Haile! roote of risse, þat fourthe brought
Þat blissid floure oure saueoure,
The whiche þat made mankynde of noght,
And brought hym vppe in to his toure.

vi Angelus.
Of þe allone he wolde be borne
In-to þis worlde of wrecchidnesse,
To saue mankynde þat was for-lorne,
And bringe þame oute of grete distresse.

i Angelus.
Þou may be gladde, bothe day and nyght,
To se thy sone oure saueoure,
He will þe croune nowe, lady bright,
Þou blissid modir and faire floure.

ii Angelus.
Marie modir, and mayden clene,
Chosen cheffe vn-to þi childe,
Of heuene and erþe þou arte quene,
Come vppe nowe, lady, meke and mylde.

iii Angelus.
Þi sone has sente vs aftir þe
To bringe þe nowe vnto his blisse,
Þer schall þou belde and blithe be,
Of joie and mirthe schall þou noȝt misse.

iv Angelus.
For in his blisse with-outen ende,
Þere schall þou alkynne solas see,
Þi liffe in likyng for to lende,
With þi dere sone in Trinite.

Maria
[rising].
A! blissid be god, Fadir all weldand,
Hym selffe wottith best what is to doo,
I thanke hym with harte and hande,
Þat þus his blisse wolde take me too:
And ȝou also his aungellis bright,
Þat fro my sone to me is sente,
I am redy with all my myght,
For to fulfille his comaundement.

v Angelus.
Go we nowe, þou worþi wight,
Vnto þi sone þat is so gente,
We schall þe bringe in-to his sight,
To croune þe quene, þus hase he mente.

vi Angelus.
Alle heuene and erþe schall worschippe þe,
And baynnely be at þi biddinge,
Thy joie schall euere incressid be,
Of solas sere þan schall þou synge.

Cantando