University of Virginia Library

dominus ait.
Hard gates haue y gon
& suffred pines mani on;
þritti winter & þridde half ȝere
haue y wond in lond here;
almast is so michel gan
seþþen y bicom first man;
seþþen haue y fond & wist
hot & cold, hunger & þrest;
Man haþ don me schame & þouȝ
wiþ word, wiþ dede & michel wouȝ;
þai tok me wiþouten sake,
þai bond min honden bihinde mi bac,
þai bete me til y ran on blode,
þai dempt me to hong on rode;
alle for adams sinne ywis,
þan haue y þoled þis.
adam, þus dere haue y bouȝt,
& þou no louedest me neuer nouȝt;
adam, y haue bouȝt ful sare
& y wil suffre it na mare;
to-day y schal bring of pine
adam, þe & alle þine.

satanas dixit.
Who is þat ich here þare?
y rede þat he spek na mare,
for he may so michel do
þat he schal comen ous vnto
forto ben our fere
& loke hou we playen here.

dominus ait.
Þou may wele wite mi play
þat min wil y haue oway;
wele þou wost wat ich am,
More þan þritti winter is gan
þat þou hast frained me
forto wite what y be;
seþþen fondestow neuer nan
wiþ me as wiþ anoþer man,
& þou wost wele for þan
þat ich am more þan ani man;
þou schalt wite þis ich day
þat y schal haue min oway,
& y schal þe leue here
In sorwe among þine fere.

satanas dixit.
Par ma fay! ich hald mine
al þat ben hereinne;
wiþ resoun wil y telle þe
þat þer ogain may þou nouȝt be,
þat me bihoueþ haue & hald
& wiþouten ende wald;
for whoso biggeþ aniþing,
It owe to ben his wiþouten lesing;
adam hungri come me to,
manred y made him me to do;
for an appel þat y ȝaf him
he is min & al his kin.

dominus ait.
Satanas, he seyd, it was min,
þe appel þat þou ȝaf him,
þe appel & þe appeltre,
boþe war maked þurch me;
hou may þou on ani wise
of oþer mennes þing mak marchandise?
seþþen þou bouȝtest him wiþ mine,
wiþ resoun schuld ichaue him.

satanas dixit.
Ihesu, wele y knawe þe,
þat ful sore reweþ me;
þou art lord ouer al,
& euer was & ay be schal;
heuen & erþe weld þou þe,
þe soules in helle lat þou be;
lat me haue þat ich halde,
þat þou hast wele mot þou it wald.

dominus ait.
Sitte now stille, satanas!
þe is fallen amesas.
wenestow þat y dyed for nouȝt?
wiþ mi dede was mankin bouȝt;
þai þat haue serued me,
In blis schal þai euer be;
þai þat noþing serued me,
þai schal in helle be wiþ þe;
bot þou schalt ben in more pine
þan ani oþer þat is þereinne.

satanas dixit.
Þer may me no man wers do
þan ichaue had hiderto;
Ich haue hadde so michel wo,
þat me no rek whider y go;
Ȝif þou bireuest me of mine,
y schal bireue þe of þine;
y schal go fro man to man
& bireue þe mani an.

[d]ominus ait.
So y schal speke þe wiþ,
þat y schal do þe hold grip;
so fast schal y binde þe,
þat fewe schaltow binim me;
were þou vnbounde among men,
al þou wost binim me hem;
þe smale deuels þat er vnstrang,
þai schal among mankin gang,
& al schul þai haue pain
þat wil nouȝt stond hem oȝain.
helle ȝates, y com ȝou to,
now ich wil þat ȝe vndo;
whare is he þat ȝateward?
Ich hold him for a coward.

Iannator ait.
Ich haue herd wordes hard
whi y no may be no steward;
y lete hem stond & ren oway,
lete hem ȝeme whoso may.

dominus ait.
Helle ȝates, here y ȝou felle,
& seþþen wil ich herwe helle;
lucifer, here y þe binde,
schaltow neuer heþen winde
vntil it com domesday.
fare þou seþþen whare þou may,
fare þou seþþen ware þou fare,
no dostow neuer man care.

adam dixit.
Welcom, lord god of lond,
godes sone & godes sond,
welcom, lord, mot þou be,
long haues ous þouȝt after þe;
lord, seþþen þou art comen to ous,
þou bring ous out of þis hous;
lord, þou wost what ich am
þou me schope of erþe man,
& þou me madest formast man,
& þou me clepetest sone, adam;
& ȝif ich haue sinnes wrouȝt,
ful dere now here ichaue hem bouȝt;
whoso sinneþ ani wiȝt,
þe sinne is more þan þe pliȝt.
ȝa, leue lord, godes sone,
welcom be þou & worþ come;
al, lord, þat here be
haue ȝerned, lord, after þe;
we hope wele of þi coming
of our sinnes haue botening.

eua ait.
Knawe me, lord, ich am eue,
adam & ich ware þe so leue,
þou ȝaue ous to ȝeme paradis,
& we it ȝemed as vnwise
when we þi comandment forlete,
when we of þat appel ete;
so long haue we ben herinne,
þat wele haue we bet our sinne;
leue lord, ȝiue ous leue,
adam & his wiif eue,
to fare out of þis foule wike
Into þe blis of heuenrike.

dominus ait.
Adam, y haue ȝouen mi liif
for þe & for eue þi wiif;
wenestow ichadde ben ded for nouȝt?
for mi ded is mankin bouȝt.

abraham ait.
Lord crist, ich it am
þat þou cleptest abraham;
þou schust com to helle pine
forto haue ous, lord, for þin[e];
do astow bihet me,
bring me lord to heuen wiþ[þe].

dominus dixit.
Abraham, it was wel
þat þou seydest, eueri del,
for mi swete moder wes
born & schapen of þi fles.

dauid dixit.
Hord, ich am dauid þe king,
þat was born of þine ofs[pring]
also astow me bihet
þurch þe lore of þat prophete,
þou bring ous of þis foule [hous]
to þe blis of heuen ycore[n ous].

dominus ait.
Dauid, þou was born of mi [kin]
for þi godenes þou art m[in],
more for þi godenesse
þan for ani sibbenesse.

Iohannes dixit.
Hord crist, ich am Iohan
þat þe hof in þe flom Iordan;
now a gode while is agon,
þat y suffred martirdom;
þou sentest me þe riȝt way
Into helle, for soþ to say,
þat þou schust deliuer of hell[e pine]
þat þou þerin fond, lord, of þi[ne];
now artow comen forto do
þat þou saidest me vnto.

dominus ait.
Iohan, Iohan, ich it wat
þat y sent þe þe gat;
þou schalt se þat y schal do
þat þou seydest me vnto.

moyses dixit.
Lord þou ȝaue me al wiþ skil
þe lay sinay on þe hil.